محەمەد چەلکی
تورکیا ل سەردەمێ ئەردوغانی بوویە مۆڵا باسکێ ئیسلاما سیاسی ب هەردوو باسکێن میانڕەو و توندڕەوڤە. هەرچەندە و پشتی ئیخوان ژ لایێ پڕانیا وەڵاتێن رۆژئاڤای و ئەمریکاڤە کریە د خانا تیرۆرێ دا، تورکیا پیچەکێ ب ژیرانەتر سەرەدەریێ دگەل تەڤایا باسکێن ئیسلاما سیاسی دکەتن. ئیسلام و باسکێ ئیسلاما سیاسی ل دەف تورکیا و بتایبەت ل دەف ئەردوغانی تنێ بازار پێکرنە و بۆ قاییمکرنا پێگەهێ خوە ل ناڤ تورکیا و جیهانا ئیسلامی دا و وەک کارتەک فشارێ ل گەل ئێکەتیا ئەورۆپا بکار بینیت.ئەڤ سیاسەتا (بانەکە و دوو هەوا) ئەردوغانی د کێشا سوریێ دا ب شەهرەزایی پەیادەکریە و ل کێشا ئاوارەیان کو مەزنترین بازار پێکریە و دەستکەفتنێن ئابووری بدەستڤە ئینانە. هەلبەت ئەڤ یاریا قرێژا ئەردوغانی هەتا دوماهیکێ بۆ نەچوو سەر بەلکو ب رێکا دەزگەهێن رۆژنامەڤانی ب تایبەت یێن تورکیا دوو رویتی و هەڤکاریا وی بۆ باسکێ ئیسلاما توندڕەو و ب تایبەت جەماعەتێن قاعیدە و بەرەیێ نوسرە و داعشێ دیارکرن کانێ چەوان ب رێکا کاروانێن هاریکاریا خەلکێ سڤیلێ سوریێ چەک و جبەخانە دگەهاندنە تەروریستان. دیاربوونا هەڤکاریا ئەردوغانی بۆ تەروریستێن ئیسلامی ل سوریێ و بازرگانیا کەسێن نێزیکی وی دگەل تەروریستێن داعشێ(پرسا کڕین و فروتنا پەترولێ)، رژێما ئەردوغانی نەچارکر ب ئاوایەکێ ڤەشارتی بەردەوامیێ بدەت هاریکاریێ. پشتی زانی ئێدی بازرگانیکرن ب کێشا تەروریستێن ئیسلامی بێ باج دەرباز نابیت(کێشا وی دگەل هەڤپەیمانیا دژی داعشێ) ئەڤجا بەرێخوە دا ئاوارەیان و کشی ئەورۆپا کرن و هەتا ئەڤرۆ ژی ل سەر ڤێ چەندێ یێ بەردەوامە لێ وەکو دبێژن سحر ب سەر ساحری دا هاتەخار و ریسێ وی ب ئێکگرتیا هەلویستێ ئەورۆپا و ئەمریکا بووڤە هری و دەست ژ پیا درێزتر ما ل سەر رویشێن بەڕێ(بەڕکێ) و بوویە قاژەقاژا وی بەرامبەری کێشا سوریێ و کو بێ دەستکەفت یێ ژێ دهێتە دویرخستن! ئەردوغان نە ژوان کەسانە بێهڤی ببیت و ئەگەرێن ڤێ چەندێ ژی ئەوە پێگەهێ جوگرافی و نێزیکیا ئەورۆپا و پشتەڤانیا ئەلمانیا یا مسوگەر(پشتەڤانیا ئەلمانیا بۆ تورکیا ئەگەرێن وی دئابوورینە و تورکیا وەک کولۆنیالەکا بازراگنیا ئەلمانیایە و هەر بۆ زانین پتر ژ ٦٥٠٠ کارگەهێن بەرهەمئینانێ یێن ئەلمانی ل تورکیانە ژبلی بۆرس و ئوتۆبان و کەرتێ گەشتوگوزارێ هەموو ددەستێن کۆمپانیێن ئەلمانان دانە) دەست ب یاریەکا دن کرەڤە، هەر یاریا بەرێ پرسا داعش و ئاوارەیان. نوکە بەرێ ئاوارەیان دایە بیلاروسیا و تەڤ ب رێکا تورکیا و کۆمپانیێن تورکیا گەهشتنە بیلاروسیا و ئێکەتیا ئەورۆپی ئەڤێ چەندێ باش دزانیت، لەوا پرسا بەردانا سەلاحەدین دەمیرتاش و عەدنان کافالا ئینایە رۆژەڤێ و ئەگەر نەهێنە بەردان، گەفا لیستەکا دن یا عمبارگۆیان ل بەندا ئەردوغانینە، ژ بلی وەرنەگرتنا ئاوارەیێن ل سەر سنوورێ پۆلەندا، ئێدی چەکێ ب کار ئینانا ئاوارەیان ژ دەستێ ئەردوغانی هاتیە دەر و تەنێ باسکێ ئیسلاما توندڕەو یا دروستر تەروریست مایە ددەستدا. لڤینێن داعشێ ل سوریێ و ل عێراقێ بڤی رەنگێ نوکە هاتیەڤە سەر دەپێ رویدانان، ب هاریکاریا تورکیایە. ئەگەر ل دەڤەرێن داعش جارەکا دی لێ پەیدابووی مێزە بکەین دێ بینین هەموو دنێزکی بنگەهێن لەشکەرێ تورکیانە ئانکو تورکیا وان دلڤینیت. ب تایبەت پشتی ژ هێرشکرنا سەر رۆژئاڤایێ کوردستانێ بێهیڤی بووی کو گۆلۆپا کەسکا روسیا و ئەمریکا بدەستڤە بینیت، لەوا ئەڤرۆ ل هەرێما کوردستانێ(دەڤەرێن نێزیکی ئوردیگەهێ لەشکەرێ تورکیا ل باشیکێ) داعش پەیدابوویەڤە و جهێ خوەپاراستنا وان د ستۆیێ هێزێن تورکیا دایە. هندی ئوردیگەهێن لەشکەرێ تورکیا ل کوردستانێ و عێراق و سوریێ بن، داعش و دەستە خویشکێن وێ دێ هەر هەبن و بەردەوام بن. ل ڤێرە پرسەک ئاراستەی هەڤپەیمانیا ناڤدەولەتیا دژی داعش دبیت، هەتا کەنگی دێ بیاڤێ یاریکرنا ئەردوغانی ب باسکێ ئیسلاما سیاسی و داعش هێتە دان؟ ب ئێکگرتنا هەلویستێ ئێکەتیا ئەورۆپی د پرسا ئاوارەیان دا مەودایێ یاریکرنا ئەردوغانی هشکرن و بن گۆرکرن. بێدەنگیا هەلویستێ هەڤپەیمانیا دژی داعشێ ب تایبەت ئەمریکا بەرامبەری نەقۆلەیێن تورکیا ئەردوغانی، سینارۆیەکێ جەهننەمی خوە ل پشت ڤەدشێریت کو تایبەتە ب بەردەوامیدان ب رەوشا ئاورتەیا دەڤەرێ و هەر بمینیت بکێشێن ناڤخوییڤە و دا هەر دەڤەر بمینیت بازارەکێ مسۆگەرێ یێن کاڵایێن وان و دەڤەر بمینیت دویری ئارامبوون و کەفتنا سەر سککێ شاریستانیبوونێ. ئەگەر ئەڤە نە سینارۆیەکێ نەخشەکری بیت، بۆچی دووبارە داعش دیاربووڤە و بڤێ هێزێ؟
