شەبان مزوری
ئەڤ نڤیسینا من دبیت بو پرانیا وە نە دەما خوەدا بیت، ئانکو درەنگ کەفت ئەگەر ئەم ڤەگەرینین بو وان بریارێن وەزارەتا پەروەردێ لسەر گوهارتنا ناڤێ پەروەردا ئیسلامی ل قوتابخانا. لێ براستی ئەڤ بابەتە بەریا پتر ژ ٣٠ سالان من ئازراندیە دناڤا جیهانا ئیسلامیدا، چونکە بو من پشتی هاتیم ئەوروپا و تێکەلی خەلکانەک زۆر بوم ژ وەلاتێن جودایێن یێن ئیسلامی پشت راست بو کو گرێدانەک مەزن هەیە لناڤبەرا پیتەپێدان بپەروەردا ئیسلامی و لاواز بونا بنگەهێ زانستێن دی لدەف قوتابیا. هەر وەلاتێ پتر گرنگی دایە بابەتێن پەروەردا ئولی، یەکسانی وێ گرنگیێ قوتابیێن وی وەلاتی لاواز دبن د بابەتێن زانستی دا.
بەلاڤ بونا رەوشەنبیریا مافێ مروڤا و نەخاسمە د سەردەما گلوبالیزمێ دا، ئێدی ئەستەمە ل وەلاتەکی مروڤ بێژیت دێ بابەتێن ئولا زالدەست فەرمی بن ل قوتابخانا و بو ئولێن دی ئەو ماف نینە. لڤێرە چارەسەری دێ بیتە پەروەردەک لسەر بنگەهێ ئولی و تاکەکەسێ جڤاکێ لسەر وی بنگەهی هەر ژ تەمەنێ زاروکی وێ خوە ژ خەلکێ دن جودا بینە. گەر موسلمانا ماف هەبیت پەروەردا ئولی ل قوتابخانا بخوینن، هەمان ماف دڤێت ئێزدیا، کریستیانا، سابیا، کاکەیی یا، یارسانا، عەلەویا….هتد هەبیت. باشە وی دەمی چناڤ لوەلاتی بکەی؟ لڤێرە ئەم بزانین ناسناما ئولی پێشیا ناسناما مروڤاتی و نەتەوایەتی و نیشتیمانی ددەین.
من هیچ گومان نینە کو هەمی پەروەردێن ئولی ژ تەمەنێ زاروکی کو بئارمانجا ئاڤاکرنەکا چاکە ل پێشە روژێ بو وی زاروکی ب زیان بو وی زاروکی ڤەدگەریت، چونکە زاروک ئامادە نینە ٩٩% ژوان تشتێن بو تێنە گوتن لسەر ئولی بهەلسەنگینە و بپەژرینە، وێ دەمێ بەشەک مەزن ژ مەژیێ زاروکی وێ مژویلی بەرسڤێن وان پرسا بیت یێن کو پەروەردا ئولی بو پەیداکرین.
من دڤێت راشکاوانە بێژم کو دڤێت هەمی وانێن ئولی ل قوتابخانێن نیشتیمانی بێنە راگرتن، هەروەسا بەشداریا زارۆکا یانژی سنێلا نەخاسمە تا تەمەنێ پازدە سالی دکارێن ئولی دا بێتە راوەستاندن ژهەمی دەسگاهێن میریڤە. لێ ئەگەر لایەنگرێن ئولەکی قوتابخانێن تایبەت ڤەکەن بپەروەردا وئولێ خوە دڤێت لایەنێن پەیوەندیدار لسەر بکەن مەرج کو هەمی بابەتێن لقوتابخانێن میری تێن خوەندن لوان قوتابخاناژی هەبیت، هەروەسا لایەنێن میری دڤێت بەردەوام چاڤەریێ بکەن کو زاروکێن دچن ڤان قوتابخانا کارەکێ بزوری نینە ئانکو پێچەوانەی داخازێت وان نینە.
لگەل هەمی رێزەکێ بو خوەدان ئولێن جودا بمن زۆر گرنگە پێشەوایێن ئولی راشکاوانە بێژنە خەلکی کو باوەری بئولەکی و بسپوری د ئولەکیدا دوو تشتێن ژ هەڤ جودانە. مللەتەک پێشڤە نەچویە کو پرانیا خەلکێ وێ پەرستگا کربنە ناڤەندا کاری و مژویل بون بئولی ڤە ژبو خوە کربیتە کار. چەوا دەما کەسەک نەخوەش دبیت قەستا دوکتوری دکەت، سەرەرای کو رەوشەنبیریا گشتیا تەندوروستیێ دبیت د ئاستەک بەرز دا لدەف هەبیت لێ دیسان بو کێشێن تایبەت پێتڤی ببسپوری هەیە. ئەڤ یەکە لسەر هەمی باوەرمەندێن ئولاژی دەرباس دبیت، ئانکو پرانیا باوەرمەندا پێزانینێن کویر لسەر ئولا خوە نینن و پێویست ناکەت، چونکە هەرکەسێ ئولدار بو پرسێن ئولیێن کو بئالوز دوزانیت وێ قەستا بسپورێ خوەیێ ئولی کەت.
بکورتی و بکوردی گەر مە بڤێت پێشکەڤین و ململانێ لگەل مللەتێن دی بکەین دڤێت ل پەروەردێ ئەم پەرەپێدانەک باش بکەین بزانستێن خوزایی و مروڤایی.
