شەبان مزوری
هەلبژارتنێن دوماهیکێ بو پەرلەمانێ عیراقێ بێ گومان بو هەرکەسی سەلماند کو خەلکێ عیراقێ برەنگەک گشتی نە رازینە لسەر شێوێ برێڤەبرنا وەلاتی. یەکەم هەلبژارتنن کو پرانیا خەلکێ عیراقێ بەشداری تێدا نەکری بهەمی پێکهاتێن خوە. دو یەمین لناڤ هەمی پێکهاتا چەند هێزێن نوی دەرکەفتین، هەروەسا بەشەک بەرچاڤتر ژ بەرێ هژمارا کەسێن سەربخوە بەرەڤ هەلکێشانە. ئەڤ موزایکە بێ دو دلی پەیاما خەلکێ لدژی پارڤەکەرنا دەستهەلاتێ یە لدویف کورسیکێن هەر لایەنەکی لناڤا پەرلەمانی.
یەکەمین خولا پەرلەمانی کو پەرتەوازی لناڤا هەمی پێکهاتێن سەرەکیێن عیراقێ نیشا ددەت، نە شیعە، نە سوننە و نە کورد هەمی یەک هەلویستن، بەلکو تا راددەکێ مەزن دژهەڤی ژی هەیە لناڤا هەمیا دا. دبیت بدیتنا زۆر کەسا تایبەتی مە کوردا ئەڤە کارەک نە باش بیت چونکە بسالانە ئەم لسەر یەک رێزیا کوردان دئاخڤین ل بەغدا و ئەم هەمی دوزانین نە یەک رێزی هەبویە و نە یەک پرسەکا مەیا هەلاویستی لگەل بەغدا هاتیە چارەسەر کرن. بوهانا هەمیاژی ئەوە کو هەر کەسێ ژبو خوە کارکریە و نەخواستیە کاری لسەر پرسێن مەیێن نەتەوی بکەن. ئەڤرو ئەم دبینین بئاشکرا فراکسیونێن پەرلەمانی لسەر دو بەرەیێن مەزن دابەش بینە و ئەو بەرە هەمی رەنگێن پێکهاتێن عیراقێ بخوەڤە دگرە.
بەرەیێ یەکەمین پەدەکا کوردستانێ، سوننەیێن هەڤالێن حەلبوسی و خەمیس خەنجەر لگەل رەوتا سەدر. بەرەیێ دویەمین یەنەکە، بەشەک کێم ژ سونیا و رێکخستنێن حەشدا شەعبی یێن شیعە. بدیتنا من هەریەک ژڤان بەرا یێ بکارە دەنگێن پێتڤی بدەست بینە ژبو پێکئینانا حوکمەتێ، ئەز بخوە دێ پیرۆزز بایێ لێکەم، چونکە ببوچونا من ناڤێن وان ژ هەڤ جودانە لێ ناڤەروک وەک هەڤن.
بو مە کوردا ڤێ جارێ زۆر گرنگە کو پارتی و یەکەتی هەردو لناڤا حوکمەتێ نەبن، ژبو رێ لوان بێتە گرتن لسەر شکەستنێن لگەل بەغدا تینن، وەک ئەم هەمی دوزانین هەرکەس یێ دن تاوانباردکەت لسەر وان شکەستنا. ئەو لایەنێ کوردی یێ بکەڤیت ناڤ حوکمەتێ دڤێت هەمی پوستێن بو کوردان هەنە ئە لایەن بتەنێ پر بکەت و هیچ پارتەک دن کوردی بەشدار نەبیت.
هەر لایەنەک کوردی بسەرێ خوە بەشداری حوکمەتا بەغدا بیت ئەو لایەن دێ بەرپرس بیت ژ هەمی چاکی و خرابیێن حوکمەتا بەغداد، لایەنێن دن یێن کوردی بلا ببنە چاڤدێرێن ئەکتیڤ و رەخنەگرێن چالاک هەمبەر حوکمەتێ، بڤی رەنگی هیچ لایەنەک نەشێت لایەنەکێ دی بکەتە پاساو ژبو شکەستنا خوە.
حوکمەتەک زۆرینە ببەشداریا یەک لایەنەک کوردی بتنێ ل بەغداد وێ ببە نمونەک جوان ژبو کو هەمان رەفتارا ئەم لناڤ عیراقێ دکین، لکوردستانێ ژی بکین، ئانکو دوماهیک بینین بدابەش کرنا داهاتێ وەلاتی لسەر بەرپرسێن رێکخستنێن کوردی.
مە وەک کوردێن باشور زۆر ئاخفتین لسەر یەک رێزیا کوردا و بتایبەت لبەغدا لێ دڤێت ئەم خوە نە خاپینین بناڤێ یەکرێزیێ چونکە اەم دوزانین ئەڤا دگوتن یەکرێزی بەرهەمێ وێ ئەڤرویا مەیە، کو موسل، شنگال، مەخمور، کەرکوک وخانەقین پشتی ١٩ سالا ژ نەما رژێما بەئس هێشتا ڤەنەگەریاینە سەر هەرێما کوردستانێ. تشتەک دن ژی بمن زۆر گرنگە هەرچەندە یەنەکێ و پەدەکێ هەمی تشت لسەر خوە بەلاڤ کریە لێ هەردەما هەلبژارتنەک هاتە کرن یانژی گرژییەک لناڤ وان پەیدا بو بێ دو دلی هەر ئالیەک یێ دن بخائین بناڤ دکەت و وەک بەرپرسا هەمی گرفتاریا پێناس دکەت.
مە وەک پرانیا گەلێن دن پێویست نینە ب یەکرێزیێ، بەلکو لسەر ئەرکە رێزێ لهەڤ بگرین و دەست بەردەین ژ پلانێن نە هێلانا هەڤدو، بەلکو پێویستە خودانێن هەر بوچونەکێ مژویل بن بپێشخستنا رێکخستنا خوە.
بکورتی و بکوردی زۆر کەس پارچە بونا کوردا لناڤ پەرلەمانێ عراقێ وەک کارەک زیانبەخش بو کوردا دبینن لێ بمن ئەڤە دەستپێکەک زۆر تەندوروستە ژبو هەر لایەک لدویف دونیا بینیا خوە بو بەرژەوەندیا گەلێ کورد لباشورێ کوردستانێ بزاڤ و تەکتیکێن خوە بکەت.
