ئابوریكوردستانینێرین

نە ژبو هاریکاریا مالدارا بسامانێ بەلەنگازا

شەبان مزوری

من باوەریەک زۆر هەیە یو پرانیا خەلکێ مە لدژ ڤێ بوچونا من بیت لسەر بابەتەک کو خەلکەک پێ هاتیە خاپاندن ب دەهان سالا، هەروەسا خواندنەکا نە تەندوروستا ئەوێن خوە بئەپوزسیون ناڤکری لقوناغێن جودا دا لناڤا هەما بێژە هەمی وەلاتێن ژێرا تێ گوتن جیهانا سێیێ. هەردەم ئوپوزسیونێ هەولدایە هەستا خەلکی بو خوە راکێشیت لسەر بنگەهێ خوەشکرنا ژیانا وان بهاریکاریا حوکمەتێ راستەو خوە لسەر چەند پێداویستیان وەک نان، سوتەمی، کارەب، ئەرد و خانی، خێزان پێکئینان…. هتد داوی ژ ڤان لەوچەیا. ئەڤ جورە پرۆپاگاندە چ بزانین بیت یانژی ژ ساویلکاتی بیت خەلکێ ڤان وەلاتا زۆر پەسیڤ ( نە چالاک ) کر. ئانکو شوینا خەلک بدەستێ خوە هەولبدەت بژێوا ژیانا خوە پەیداکەت، خەلک مژویل کر بگازندا، بوچی حوکمەت ڤێ ناکەت، حوکمەت دشێت مە هەمیا خودانکەک بێی کو تبلا بری خوێکەین، بکورتی وەلات ببیت تەمبەل خانە.

بەری بچم ناڤ بابەتێ سەرەکی من دڤێت ئەو خەلکێ من ناس نەکەت ژی بزانیت کو ئەز دژی هەمی سیستەما دەستهەلاتداریێ مە لباشورێ کوردستانێ ئەگەر ئەم ناڤێ سیستەمێ لێبکین، نەک ئەڤرو بەلکو هەر پشتی بەرەیێ کوردستانی بشەش هەیڤا دەستهەلاتداری کری. چونکە دبیت خەلکانەک بێژیت ئەز ژی بویمە دەهۆل قوت و زورنابێژێ دەستهەلاتێ، یان ژی ئەز ژی وەک گەلەک کەسا بندیوار، ناڤدیوار یانژی سەردیوار بم.

ئەڤ نڤیسینا من نەک باوەریەکە ئەڤرو بو من دوروست بویە بەلکو ژ تەمەنەکێ زوی من ئەڤ بوچونە هەبویە. ئازراندنا ڤی بابەتی جارەک دی ژ لایێ من ڤە کارڤەدانەکە لسەر بەشەک ژ بابەتێن روژەڤێ بو پرانیا خەلکی. ئەز دێ هەولدەم بکورتی بوچونا خوە پشراست کەم بچەند خالەکا.

بمن زۆر پێویستە ئەم بزانین کو کارێ حوکمەتێ تەنها رێکخوەشکرنە کو هەمی هاولاتیا دەرفەتێن یەکسان هەبن ژبو بزاڤا گوهارتنا ئاستێ ژیانا خوە، دوروست کرنا مەرجێن پێکئینا ڤان رێکخوەشیا، وەک پەروەردەک باش، ژێرخانەک باش، بازارەک ئازاد دویر ژ قورخکاریێ، سیستەمەک تەندوروستی هەڤچەرخ، دامەزراندنا پرۆژێن نیشتیمانی…هتد ئەڤە کارێ حوکمەتێ یە.

ڤان رۆژا من بابەتەک دیت لسەر نانپێژا ل دهوک، خوەدانێن وان دگوت حوکمەت دخوازیت بوهایێ نانەکێ ببیتە ١٠٠٠ دینار و ئەڤە دێ روی دەت ئەگەر حوکمەت پشتگیریا وان نەکەت بسوتەمەنی و هندەک پێداویسن دی. لڤێرە گرنگە بمن بێژم ئەو حوکمەتا مژویلی بوهایێ نانی بیت کارێ وێ نە حوکومرانیە بلا بچیت بو خوە نانپێژیەکێ دانیت باشترە. دڤێت خەلکێ مەیێ بەلەنگاز بزانیت کو هەر هاریکاریا حوکمەت بو هەر تشتەکێ لجڤاتێ بکەت ژ سامانێ گستی دچیت و بو هەمی خەلکی دچیت ، زەنگین و بەلەنگازا لەوما نابیت حوکمەت کارەک بڤی رەنگی بکەت. یەکەمین پێنگاڤ دڤت نانپێژ ئازاد بن د نرخ دانا بەرهەمێ خوەدا، گشتک چەند گرامە ئەو نە کارێ حوکمەتێ یە، ئەو بەرپرسیاریا بکری یە. دەما بوها ئازاد بیت دێ ململانێ لسەر بوها و چاکیا بەرهەمی بیت، هەر کەسەک دێ هەولدەت بەرهەمەک باشتر ب نرخەک گونجا تر داخیتە بازارێ.

دیسان بابەتێ سوتەمەنی وەک هەمی زستانا بویە رۆژەڤ لدویف پێزانین من بوهایێ بەرمیلێ لسەر حوکمەتێ ٩٠٠٠٠ دینارە، لێ لداخویانەکا عەلی حەمە سالح بو روداو دهوک، دبێژیت پلان ئەو بو حوکمەت ب ٥٠٠٠٠ دینارا بدەتە خەلکی، ئانکو هەر بەرمیلەکێ حوکمەت ٤٠٠٠٠ دینارا بدەت، لێ دیسان دڤێت ژبیر نەکەین کو ئەڤ پشتگرتنە بو زەنگینا ژی یە؟ لەوما نابیت بسامانێ گشتی پشتگیریا زەنگینا بێتە کرن. هەروەسا بمن کارێ وەزیرێ سامانێن سروشتی ئەو نینە بچیت مالێن خەلکی و بپرسیت کانێ سوتەمەنی وەرگرتیە یان نە لێ وەسا دیارە جامێری یێ بێکارە؟

د سەرەدانەک خوەدا بو دهوک بەریا چەند سالا یەک ژ کارمەندێن کارەبا دهوکێ گوتە من حوکمەت پتر ژ ٧٠% پشتگیریا خەلکێ دکەت بو بوهایێ کارەبێ، لڤێرە بمن زۆر ئاسانە کو ئەم بزانین کەسێن هەرێن سودمەند زەنگینن و خەلکێ خوەدان داهاتەک مەزنن. بو نمونە ئەگەر خوەدان داهاتیەک کێم هەیڤێ ٥٠٠٠٠ دینارا بدەت ژبو کاربێ واتە حوکمەت پشتگیریا وی ١٥٠٠٠٠ دینارا دکەت، ل لایێ دن ئەگەر زەنگینەک ژبو خانیێ خوە و سەیرانگەها خوە ٥٠٠٠٠٠ دینارا هەیڤێ بدەت ژبو کارەبێ واتە حوکمەتێ ب کوژمێ نێزیک ١٥٠٠٠٠٠ دینارا هاریکاریا وی زەنگینی کریە، لڤێرە ئاشکرا دبیت بێ دو دلی کو سوندمەندێن یەکەمین ژ پالپشتیا حوکمەتێ زەنگینن و خوەدان داهاتێن بلندن.

ئاسایی یە خەلکانەک پرس بکەن و بێژن باشە خێزان و کەسێن کێم دەرامەت چەوا وێ بکارن پارێ ڤان هەمی تشتا بدەن ئەگەر بێنە ئازاد کرن، بەرسڤ زۆر ئاسانە و لڤێرە رولێ حوکمەتێ دێ یێ ڤەبر و بریاردەربیت برێکا بلندکرنا داهاتێ خوەدان موچە، خانەنشینی و کێ داهاتا ژڤی پارێ تێتە مەزاختن بناڤێ پشتگیریا هاووەلاتی، ئانکو ئەڤ کوژمێ پارەی راستەوخوە بچیت بو پالپشتیا خەلکێ کێم دەرامەت.

بکورتی و بکوردی ئەگەرخەلکێ مەیێ کێم دەرامەت بهشیاری سەردەریێ لگەل سامانێ گشتی نەکەت وێ دەمێ بەلەنگاز دێ بەلەنگاز ترلێهێت و زەنگین دێ زەنگین ترلێهت.

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close