كوردستانینێرین

جووداکرنا عەشیرێ ژ دەولەتێ!

میر نێروەی

یەک ژ مژارێن ب هەمان ئاوایێ ڤی ماشێتی بناڤێ، جووداکرنا دینی ژ دەولەتێ یە، لێ مژارا دینی دیرۆکەکا درێژا ل سەرانسەری جیهانێ هەیە، هەڤدەم د رەوشا مەیا هەرێما کوردستانێ دا دوو خالا پتری هەمی خالێن دی باندوریێ ل دەولەتێ دکەن، نەبتنێ ژ دامودەزگەهان بەلکی کێشا کوردی ژ دەستپێکێ هەیا نها بوویە قوربانی باندورا عەشیران و هەیا نها ژی باندوریێن خراب لسەر ژیانا مە دکەن و مەنەکاریە ب واتایا درۆست عەشیرێ بکاربینیت، تەمامکەرا عەشیرێ ژی بۆ تێکدانا رەوش و گوزەرانا مە حزب بوویە.

لێ خالا م دیارکری باندورا عەشیرێ یە کو ب ئاوایەکێ زوور مەزن لسەر دامودەزگەهێن دەولەتێ هەیە، ئەڤ باندوورە سەدەمەکێ سەرەکی یە بوو درۆستبوونا گەندەلی کو دزینا پارێ گشتی یە و بەرتیل وەرگرتنێ کو وەرگرتنا پارەکێ یان تشتەکێ ل هەمبەر برێڤەبرنا مامەلەکێ دا دهێتەوەرگرتن، و بکارئینانا رێڤەبەریێن میری بۆ مەرەمێن خۆ یێن تایبەت، کو نها عەشیر ستونەکا مەزنا خۆراگرتنا بەرتیل و گەندەلیێ یە.

ل هەرێما کوردستانێ گەندەلی و وەرگرتنا بەرتیلێ د ئاستەکێ هەری بلند دایە و دکارین بێژین پتریا جڤاکی توشی گەندەلی و بەرتیلدان و بەرتیل وەرگرتنێ بووینە، و ب ئاوایەکێ دیار دهێتەکرن و هەر کەسەکێ پۆستەک وەرگرت پشتی دەربازبوونا سالەکێ نیشانێن ملیونێران لێ دیار دبن، کو د شیان دا نینە ب مووچێ خۆ، وێ بدەست بێخیت. هەڤدەم د کەرتێ گشت و تایبەتی دا د ئاستەکێ بلند دایە.

هەڤدەم ل پتریا وەلاتێن گەندەلی هەیی، گەندەلی بتنێ د ئاستێ دەستهەلاتێن بلند دا دهێتەکرن، هەڤدەم گەر ئەم تەماشەی هەرێما کوردستانێ بکەین د ئاستێ بلند و خوارێ دا گەندەلی و بەرتیل بوویە رووتین و دیاردەکا ئاسایی، ئەڤە ژی بۆ باندوریا عەشیرێ ڤەدگەریت، ژ خالێن دیارێن ڤێ باندورێ ئەوە دەما پۆستەک دهێتە پڕکرن، کەسەک لسەر ئاستێ عەشیرێ دهێتەدانان، ئەڤ جورە پۆستە ژی خۆ ژ وەزیر و پارێزگار و رێڤەبەرێن گشتی و پەرلەمانتاران دا زێدەتر ب ئاوایەکێ زەلال دهێتە دیتن، و هند جاران عەشیر هەڤرکیێ لسەر وەرگرتنا پۆستێن گرنگ دکەن.

هەردیسان د رێڤەبرنا کاروباران و مامەلەیان دا، دامودەزگەهێت دەولەتێ بوو مەرەمێن خۆ یێن تایبەت بکار دئینن، وەکی ( خاترگرتن، کارەکێ بۆتە بکەم و توی کارەکێ بۆ من بکە، هاریکاریەکا نەیاسایی، شەرم ژ هەڤدووکرن، هاتنا کەسەکێ ژئالیێ بەرپرسەکێ یان ئاغایەکێ ڤە، تێلەفونکرن و مەجبوورکرن، مرۆڤ مرۆڤکانێ، پێدانا پارە وەک بەخشیش، پێدانا کەلوپەلێن گرانبەها ژێر ناڤێ دیاری، جهێ تە نیاسەک لێ هەبیت کارێ تە لبەری یێ هەمیان دێ بڕێڤەچیت…. ) ئەڤە هەمی و مەزنتر رۆژانە د دامودەزگەهان دا دهێنەکرن و هەمی گرێدایی باندورا عەشیرێ یە و دگەل وێ دا ژی عەشیر و حزب پێکڤە فشارێ لسەر دامودەزگەهان دکەن، هەڤدەم خالا هەری دیار کو شەرعیەتێ ب ڤی ئاوایێ رێڤەبرنێ ددەت، دانانا کوچکێن ئاغایان و هەبوونا بودجەکا دیارکری و دگەل دەستهەلاتەکا بلند پێ هاتیەدان ژ ئالیێ حکومەتێ ڤە.

دخوازم لڤێرە زەلال بکەم، دەستێوەردانا عەشیرێ د کاروبارێن دەولەتێ دا، دیاردەکە بەرۆڤاژی بنەمایێن دیموکراتی یە و هەر ئەڤ خالەیە دادپەروەریا جڤاکی تێکددەت، فەرە هەر چنەبیت د مافێن گشتی دا بۆ بەرژەوەندیێن گشتی، یاسا ب رژدی جهێ خۆ بکەت، لڤێرە پێدڤیە باندورا حزبی و عەشیرێ لسەر دامودەزگەهان بهێتە ڕاکرن، و یاسایێن گڕان بۆ بکەرێن گەندەلی و بەرتیل وەرگرتنێ بهێنەدانان و داهاتێ وان بۆ دەولەتێ ڤەگەرینن، دامودەزگەهـ بهێنە سەربەخۆ کرن، نەزاهە و دادگەهـ ژ کەسێن راستگۆ و دەست پاک بن و چ باندور لسەر نەبن، و دەستهەلاتێن بنەجهـ پێ بهێنەدان، و لیژنێن توند بهێنە دروستکرن، چالاکیێن خۆ بکەت و رۆژانە ل دوسیان بگەرن و داخوازێ ژ وەلاتیان بکەن دگەل درۆستبوونا هەر حالەتەکێ دا پەیوەندیێ پێ بکەن.

پشتی نەمانا باندورا حزب و عەشیرێ دێ دەولەت کەڤیتە سەر رێکا خۆ یا درۆست، لێ براستی ژی یا فەرە هزر تێدا بکەین، کی مفادارە ژ هەبوونا ڤان دەستێوەردانان؟ ژلایەکێ دیڤە گەر تەماشە بکەین پتریا جڤاکێ مە موسلمانن و د بنەمایێن دینی دا ژی بەرتیل و دزین و دزینا مالێ گشتی کارەکێ رێپێنەدایە، بڤی ئاوایی جڤاک ل دژی نیشتیمان و ئاینێ خۆ پێنگاڤان دهاڤێژیت، داویجار ولات یێ مەیە و گەر ڕەوش چەند خراب ژی ببیت، پێدڤیە وەلاتی هەست ب بەرپرسایەتیێ بکەت و خیانەتێ نەکەت و دەستی بۆ وێرانکرنا ولاتێ خۆ نەبەن، و پێدڤیە ب ملکێ کەسێ دی نەزانینن.

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close