شەبان مزوری
من باوەری هەیە کو بەشەک زۆر ل خەلکێ ڤی بابەتی بخوینن وێ من مروڤەک نە دلوڤان و دویر ژ مروڤاتیێ بناڤکەن. لێ بمن زۆر جاران مروڤ نەچار دبیت بەشەک ژ راستیا بینیت بیرا خەلکەکی کو دخوازن مروڤاتی و دلوڤانیا خوە تەنها و تەنها بەس بو هەڤزمان ، هەڤخاکێ خوە نیشان نەدەن، تەنها و تەنها بو وان دلوڤانی و مروڤاتی هەڤدەردی و هەڤخەمی یە لگەل خەلکێ دن یێ دونیایێ.
بێ گومان مروڤەک تەندوروست ژ لایێ دەرونی ڤە نابیت بهیچ رەنگەکی شاد بیت ب مرن و کوشتنا خەلکەک بێ تاوان و نەخاسمە زاروک بهیچ پیڤەرەک ئولی و دونیایی تاوانبار نابیت بسزا کوشتنێ. لەوما دڤێت هەرکەس بزانیت کو بو من زاروک کەسەک بێ تاوانە چونکە زاروک هیچ تشتەک بخوە نا هەلبژێرن بەلکو میراتگرێن بیولوجێن چەند ناسناما نە کو ژ مالا خوە گرتینە، بەشەک بیولوجیە وەک رەنگێ پیستی و ئەنەتومیا لەشی و بەشەک پەروەردەیی یە وەک زمان، نەتەوە، ئول.
پیتەپێدان و هەڤخەمی ل؛گەل خەلکێ دوچاری کارەساتا دبن خسلەتەک پر جوانە و دڤێت دەست خوەشی ل کەسانێن بڤی رەنگی بێتە کرن. بکوردی دبێژن ئەگەر تو بەندکەک سور و زەربای دا بدەرگەهێ مالا خوەڤە بی، یانژی دبێژن لێڤ ژ ددانا پێشترن. واتە بەری هەمی کەسەکی دڤێت تو لمالا خوە خودان دەرکەڤی. پاشان گەرەکا خوە، باژێرێ خوە، هەرێما خوە، وەلاتێ خوە و پاشان ل جیهانێ. ئەز برەفتارەک تەندوروست نابینم خەلکانەک خەم و ئازارا هندەک کەسا بهزارا کیلومەترا دویر ژ وەلاتێ خوە ببینیت و هەڤخەمی و هەڤدەردی لگەل وان نیشان بدەت، لێ کەسەکێ بمێترا ژێ دور نە بینیت و لگەل دا خەمساربیت.
گەلەک کەسان موخابن ئەڤ رویدان زۆر کرێت کر بمن کو وەک خەمەک ئیسلامی نیشادای، گەلەک لەوچە د بێژن رەیان بوسرمان کرنە یەک، خەلکێ تازە زانی هێزا بوسرمانا چەندە و زۆر خەلکێ مەیێ کورد د ماوێ پێنج روژان دا بو خوە رەیان کربو کاروکەسب، زۆر کوردان پرۆفایلێن خوە ل تورێن کومەلایەتی کربون وێنێن رەیان. مللەتەک کو بدرێژیا مێژویا خوە هەما بێژە روژانە توشی نەمانێ دبیت، مللەتەک کو پرانیا وی بوسرمانە و باوەرمەندە، خورت و دەکان، قارنا و قەلاتان، سینەما ئامودێ، روبوسک، یاریگەها قاشلو، دێرسم، ئەنفال، ئەفرین، سەرێکانی، کوبان، شنگال، مەخمور، کەرکوک، دوز، ٨٠٠٠ کەسێن نێر د سەر ١٢ سالی هاتن بێ سەروشین کرن، کانی زوهاکرن، دەشت و چیا سوتن، داربرین، سەربرین وەک هوشام…….. و بهەزارا کارێن ترور ژ ناڤبرنێ لسەر کوردان بسەدان سالا بوسرمان نە کرنە یەک، ئالان لناڤ دەریایێ خەندقی و محەمەدێ ب تێزابێن ئەردوگان شەوتی، بوسرمان نەکرنە یەک؟ لڤێرە گەلو ما مروڤێ کورد ژی گوشت و خوین نینە، ما زاروکێ کورد وەک زاروکێن گەلێن دی چیچکێن بەهەشتێ نینن؟ یانژی ئەم کورد تەنها لسەر دونیایێ و بن دونیایێ بزوتین دڤێت ئاگری بەردەنە مە و جەهنەمێ پێ بشارینن.
سەردەمێ شەرێ چەکداری لسالێن هەشتیا ژ سەدا بیستا بەرەی جود هەبو، یەک ژ لایەنێن وی بەرەی پارتا کومونیستا عیراقێ بو، لگەل پێشمەرگێن پارتێن دی ل چیایێن باشورێ کوردستانێ بون، نانێ کوردا دخوار، ب چیایێن کوردا خوە دپاراست، بکورتی گوندێن کوردا پەنا کومونیستا بو. لوێ سەردەمێ کومونیستا تیپەک موسیقێ هەبو بناڤێ تیپا رێ ( فرقەت التەریق ). جارەک ئەم و هندەک چەکدارێن کومونیست پێکڤە بوین ل دەڤەرا شێخان. یەک ژ وان کومونیستا گوتە من ئەڤە کاسێتەک فرقەت تەریقە بومە لسەر تایپا خوە دانە. من گوت ببورە ئەس فرقەت تەریق لسەر تایپا لێنا دەم، گوت بوچی، من گوت هون نانێ مە دخون، لسەر ئاخا مە دژین، لێ سترانا بو بیابانا عەرەبی دبێژن، دێ کەرەمکەن هەرن وێ بیابانێ، هون لناڤ مە چدکەن؟ گوتی وەنینە. من گوت سترانا ئازادی ( حریە ) ما نابێژیت لسەر رەملا بیابانا عەرەبی دێ ناڤێ تە نڤیسم ئازادی؟
براستی ئەم مللەتەک سەیرین ، جیاواز و بێ بەڤلین بو هەژێکرنا بیانیا و بتایبەتی داگیرکەرێن وەلاتێ خوە. من تێگەهشتن هەیە بو هەمی جورە نارەزایی ل باشورێ کوردستانێ هەمبەر ڤێ دەستهەلاتا کالفام و تالانکەر، لێ من نە رێز و نە تێگەهشتن هەیە بو هەرکەسەکێ دژاتیا خوە بو ڤێ دەستهەلاتێ ب پەسندانا رژێما فاشیستا سەددام بینیت. موخابن و هزار جار موخابن کو گەلەکی هندەک کەسێن هندە ساویلک و داگیرکەر پەرێس هەبن کو پروفایلێن خوە بێ شەرمانە بکەنە وێنێن دوروندێن وەک سەددام، ئەردوگان و خومەینی. هەر کرێتیەکا هەر کوردەک ب هەرکوردەکی بکەت ئەز ئاسایی دبینم، بو من کەس پیرۆز نینە لێ شانازی کرن ب کوردکوژا دڤێت ببیتە تاوان، لەوما ئەز دەنگێ خوە دگەهینم پەرلەمانێ هەرێما کوردستانێ کو یاسایەکی لسەر ڤێ یەکێ دەرکەت و بکێماسی سێ سال زیندانی هەبیت بو هەرکەسێ پروپاگاندا سەددامێ کوردکوژ بکەت.
راگەهاندنا کوردی براستی جهێ شەرمزاریێ یە، کو بابەتێ رەیان بڤێ گرانیێ لسەر راوەستیای، لێ دوهی بو خانمەکا کورد ل رۆژهەلاتێ وەلاتی بتاوانا زمانی کوردی هاتە زیندان کرن، داعش ل زیندانا هەسەکێ پتر ژ سەد ژ لەشکەرێ قەسەدێ کوشتن، ئەرێ هەمان سەرەدەری راگەیاندنا مە هەبو ل گەل ڤان بویەرا؟ شاراوانیێن کوردا بدەنگێ خوە ل هەلبژارتنا برین لباکورێ کوردستانێ، دەما ئەردوگانێ فاشیست بزۆرێ کورد ژێ دەرخستین و پرانیا وان زیندان کرین هەڤخەمیا لکویڤە بو؟ چەند کوردا دەما حەشدا شەعبی هێرش کریە سەر باشورێ کوردستان ژ شنگال تا خانقین کارڤەدان هەبون؟
پشتی روخاندنا رژێمنا فاشیا سەددام بدەمەک کێم دو خورتێن کورد خەلکێ زاخو لسەر رێکا موسل و بەغداد هاتن سەرژێکرن، لێ من چ کارڤەدان نەدیتن.
بکورتی و بکوردی تا کورد گوڤەندا لژێر سترانا ئەز خەلەفم خەلەفم بکەت و نەیارێ هەڤ وەلات و هەڤزمانێ خوەبیت ژ لایەکی و هەڤخەم و دوستێ داگیرکەرێن خوەبیت، سوبە دێ ژ ئەڤرو کومباختر بیت.
