محسن ئوسمان
ئەز ل دەسپێکێ دخوازم چەند خالان بەرچام بکەم:• ب راستی، من نە دخوازت ئەز ل سەر مژارێن هوسا بنڤیسم، لێ ئەڤ ئارێشە گەلەک کەتە بەر گۆتوبێژان، لەورا دێ چەند بۆچۆنان بەرچاڤ کەم.• ئەز دێ پێکۆلێ کەم، وەک حزبی نەنڤیسم و هیڤیدارم بکارم بێلایەن ژی بم.ئەگەر مرۆڤ وەک پاشخانێن دیرۆکی ل رەوشا دووبەرەکیا دەڤەرێ بنێریت، ئەڤ پەژیکە رەهێن خوە دکێشیتە کووراتیا دیرۆکێ.
هەر ژ شەرێ سار و گەرمێ، د ناڤبەرا مەسەبی “شیعە و سونە” دا و تا دگەهیتە ناکۆکیێن گەرم و سارێن د ناڤبەرا “جەلالی/ یەکێتی و مەلایی/ پارتی” دا، دیسان ژ نیڤسەدەیەکێ پترە. ل سەر ڤێ ژینگەها جڤاکی و سیاسی، ئەڤ شەر و دووبەرەکیە، د ناڤبەرا یەکێتی و پارتی دا یا بەردەوامە. لەورا ل هەر دەلیڤەکا بەربار، ژانێن برینا تۆلهلدانێ گەرم دبنەڤە.ل گۆر ل هەڤهاتنا د ناڤبەرا یەکێتی و پارتی دا هاتیەکرن/ 2005، کو پۆستێ سەرۆکێ هەرێمێ بۆ پارتی بیت و پۆستێ یەکێ ژی ل بەغدا بۆ یەکێتیێ بیت و پاش ئەڤ ل هەڤهاتنە، وەک ئیتیفاقیا ستراتیژیا د ناڤبەرا یەکێتی و پارتی دا/ 2007، ب فەرمی هاتە ناڤیژکرن/ ئیمزاکرن.
راستە ل سەر ڤێ ئیتیفاقێ، گەلەک نزمی و بلندی هاتنەکرن، لێ تا نوکە ب فەرمی ئەڤ ئیتیفاقیە نەهاتیە هلوەشاندن.من دڤێت ل ڤێرێ، چەند خالان بەرچاڤ بکەم:
1 . وەک ئەز دزانم، تا نوکە ئەو ناکۆکیێن د ناڤبەرا یەکێتی و پارتی دا ل سەر پۆستێ سەرۆک کۆماری، ب وی ئاستی د مالا شیعی و سونی دا ل سەر پۆستێ سەرۆکێ پەرلەمانی/ پشکا سونەیان و پۆستێ سەرۆکێ حکوومەتێ/ پشکا شعەیان نەهاتینەکرن.
2. تا نوکە هیچ لایەن و پارتەکا کوردی، کاندیدەک وەک هەڤرکێ کاندیدێ پارتی، بۆ پۆستێ سەرۆکێ هەرێمێ بەربژێر نەکریە.
3. یەکرێزی و ئارامیا هەرێما کوردستانێ ژ پۆستێ سەرۆک کۆماری بۆ هەردوو ئالان گرینگترە، چونکو ئەڤ گڤاشتنێن پارتی ل سەر یەکێتیێ دکەت، کو دڤێت “پۆستێ سەرۆک کۆماری و پارێزگەرێ کەرکووکێ بۆ وان بیت یان ژی ب دلێ وان”، دێ ب ئاوایەکێ یەکسەر/ نە یەکسەر باندۆرێ ل سەر رەوشا چەواتیا برێڤەبرنا حکوومەتا هەرێما کوردستانێ کەتن. دیارە سەرۆکێ هەرێمێ و سەرۆکێ حکوومەتێ ژی هەردووک پارتینە و دێ کارتێکرن ل سەر کار و دەسەلاتا وان هەبیت. لەورا دڤیا پارتی هوورتر و کوورتر، هزر د ڤێ مژارێ دا کربان.
4 . ئیرۆ هەر کەس دزانیت هێز رۆلی ل ڤێ دەڤەرێ دبینیت و رەوتا سەدر ژی، ئەو هێز نینە بکاریت ترازیا یاریێن سیاسی ل دەڤەرێ راگریت. هەروەک نموونە ئیتیفاقیا شنگالێ بگرە، ئەڤا د ناڤبەرا هەڤلێر/ پارتی و بەغدا/ کازمی دا هاتیەکرن، چ ئەنجام هەبوون؟!، کو رەوتێ سەدر پشتگریا کازمی دکر!
5 . پارتی پشتا خوە ب دەنگێن شاخەوان عەبدولا/ جێگرێ دووهەمێ سەرۆک پەرلەمانی گەرم کریە، بەلێ پۆستێ سەرۆک کۆمار و جێگرێ دووهەمێ سەرۆک پەرلەمانی، گەلەک ژێکجودانە. پۆستێ جێگرێ دووهەمێ سەرۆک پەرلەمانی د حسابێن هێزێن دەرۆبەر دا نینە، بەلێ پۆستێ سەرۆک کۆماری دەولەتێن دەردۆر/ ئیران یەکلا دکەت.
6 . پارتی پلان و ئەجندایێن خوە ل سەر کورسیکێن پەرلەمانی داناینە، لێ رۆلێ “هێز، ئەرد و جوگرافیا سیاسی”، گەلەک ژ کورسیکێن پەرلەمانی ب باندۆرترە.
7. ئەگەر پارتی خوە ب برایێ مەزن بزانیت، دڤێت رۆلێ برایێ مەزن د تەڤ واران دا ببینیت. لەورا دبێژم، پارتی پۆستێ سەرۆک کۆماری ببەت یان نە، هەر دێ پارتی زەرەرمەندێ یەکێ بیت. (هەرچەندە ئەز باور ناکەم، کاندیدێ پارتی بۆ سەرۆک کۆماری، دەنگان ل ئاستێ پێویست ببەت!)* هیڤیدارم ئەو دۆست و هەڤالێن دخوازن، ب کۆمێنتێن خوە بەشدار ببن، ب ئاوایەکێ بابەتیانە بنڤیسن، دووری بریندارکرن و ئاخڤتنێن کرێت بن. سلاڤ و گولاڤ…محسن ئۆسمانبەرلین،
2022.02.02
