رۆژه‌ڤكوردستانینێرین

بلا کەیفا عێراقیێن عیار ٢٤ بهێت!

Ingen fotobeskrivning tillgänglig.

محەمەد چەلکی

     پەندەکا عەرەبی دبێژت:” کۆڤان تەک تەک ناهێن”، ڕاستی ژی وەسایە بەری چەندەکێ دادگەها فیدڕالی بڕیارا نە دەستوریا فروتنا پەترۆلێ ژ لایێ هەرێما کوردستانێڤە دەرێخست. تەڤ ژی دزانن ئەڤ بریارە یا ڤەبڕە و چ مەودا بۆ ڤەخاندنێن جودا و تانە لێدانێ نینە، هەر کەسێ سەرپێچیێ بکەت ب تاوان دهێتە هەژمارتن و سزا ل پەی دهێت!

     بڕیارا دادگەها فیدڕال زەنگەکا مەترسیێیە و ئاکامێن وێ دێ گەلەک ب نەگەتیڤ ل سەر حوکمەتا هەرێمێ ڕاوەستن و یان دن ژی دوهی ٢٢-٠٢-٢٠٢٢ عێراق ب فەرمی ژ بن سهانەتا برگێ ٧ێ یێ ئێکەتیا نەتەوەیان دەرکەفت کو تایبەتە ب بەرخوردێ شەرێ کوێتێ(٢-٠٨-١٩٩٠) و پرسا قەرەبۆیان.

     یێن شارەزایی سیاسەتێ و چەوانیا برێڤەچوونا پرۆسەسا وێ باش تێدگەهن کو ئەڤ بریارا دادگەهێ یا چاڤەرێکری بوو، چونکو هەرێما کوردستانێ بێی خوە ل بریارا دادگەهێ بگرت، دەست ب فرۆتنا پەترۆلێ کر! ئەو ب خوە دهاتە خاستن، حوکمەتا هەرێما کوردستانێ خوە ل بریارا دادگەهێ گرتبایە. ئەگەرێن خوە لێ نەگرتنا حوکمەتا هەرێمی بۆ بریارا دادگەهێ ناهێتە زانین و هەتا ڤێ گاڤێ ژی حوکمەتێ چ داخویانی نەدانە و تەنێ گازندە و ب سیاسیکرنا ڤی بابەتی ڤەدجویت، کو ئەڤە ب خوە چ کار لێ بریارا دادگەهێ ناکەت. ئەرێ د شیانێن حوکمەتا ناڤەندا هەیە ڤێ بریاری جێبەجێ بکەت، ئەڤە پرسیارە و دڤێت حوکمەتا هەرێمێ ل سەر ڤێ چەندێ کار بکەت، نەک کۆمکرنا لەشکەرێ توتی و مەلاقا و بەردانا وان بۆ سەر دێمجانێن(شاشە، ئەرکان) تیڤیان کو ئەڤرۆ کەنیێ مرۆڤی ب ڤان گۆتن و شرۆڤێن وان دهێت!

     ئاکامێن بریارا دادگەها فیدڕال و دەرکەفتنا عێراقێ ل بن سیهانەتا برگێ ٧ێ ئێەکتیا نەتەوەیان دێ گەلەک گران ل سەر حوکمەتا هەرێما کوردستانێ ڕاوەستن! ب تایبەت ژی دەرکەفتنا عێراقێ ل بن برگێ ٧ێ ئێکەتیا نەتەوەیان چونکو د بریارێ دا هاتیە ئێکپارچیا ئاخ و سەرەوەریا عێراقێ دڤێت یاپاراستی بیت.

     دویری سوزاداری و دلنەوازیکرنێ ئەڤ هەردوو بریارە بۆ هەرێما کوردستانێ دمەترسیدارن و خەوانا عێراقچیێن عیار ٢٤ و داگیرکەرێن کوردستانێ دهێتە شکەڤا وان و ئێکپارچەیا ئاخ و سەروەریا عێراقێ دێ کەڤتە وارێ جێبەجێ کرنێ و ئێدی بریارا ٦٨٨ێ ژ کار دکەڤت چونکو پەیوەندی یا هەی ب کێشا کوێتێڤە، واتە ئێدی هەرێما کوردستان وەک چرایەکێ نەتەوی و رویگەها چارەسەریا پرسگرێکا کوردی ل هەر چار پارچێن کوردستانێ نامینیت چونکو عێراق دێ پێگیر بت ب پاراستنا سەروەریا سنوورێن هەڤسویێن خوە، ئەڤە ژی دێ حوکمەتا هەرێمێ نەچار کەت دەست ژ پێشەنگیا پرسگرێکا کوردی بەردەت.

     ڤەحەواندنا پارتێن رۆژهەلاتێ کوردستانێ، باکورێ کوردستانێ و سوریا دێ بزەحمەت کەڤیت ب تایبەت یێن رۆژهەڵاتێ کوردستانێ ئەوا عێراقێ ب سەرێ موجاهیدینی خەلق ئینای هەر ئەو پاشەرۆژ چاڤەرێی پارتێن رۆژهەڵاتێ کوردستانێیە.

     سەرکرداتیا سیاسیا کوردستانی ل سەر هەرفتەکێ مەترسیدارە و کارەساتەک مەزن ل پێشییا مەیە هەرچەندە نوێنەرا نەتەوەیێن ئێکگرتی ل عێراقێ خاتوین بلاسخەرتێ زەنگا مەترسیێ بۆ سەرکرداتیا سیاسیا کوردی لێدابوو دەما گۆتی: “هزر نەکەن ئەڤ رەوشا هەرێما کوردستانێ ب ڤی رەنگی بمینیت”. نوکە ئەو مەترسی یێن دبنە ڕاستی، پرسیارا هەرە گرنگ و بەرسڤ ژی هەر ئەوە کانێ دێ ئەڤ سەرکرداتییە کاریت ب ئاوایەکێ عەقلانە و ب نەفەسەکا دیبلۆماسیەکا دومدرێژ سەرەدەریێ دگەل ڤێ رەوشێ کەت کو ل دوایێ د بەرژەوەندا کوردان دا ب دوماهی بهێت. ئەڤە بتنێ برێکەکێیە، ئەو ژی ب هەڤڕا کارکرنا سەرکرداتییا سیاسیا کوردیە دویری موزایەدە و کی برا مەزنە لێ رەوشا ئیرۆیینا سیاسیا کوردی ڤێ چەندێ ماندەل دکەت، ئەڤە ژی دلی عێراقیێن عیار ٢٤ و تەڤ نۆکەرێن داگیرکەرێن کوردستانێ خوەش دکەت.

٢٣-٠٢-٢٠٢٢

دهۆک

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close