جیهانیرۆژه‌ڤنێرین

دوهی کوبا و ئیرۆ ئوکرائینا پا کانێ کورد!؟

محسن ئوسمان

ب سەرپێهاتیا دیرۆکێ دیار دبیت، کو تا نوکە ئەم نکارین رەوشا خوە فام بکەین، چونکو پرسگرێکا گەلێن پاشڤەروو دوورهێلێ خوە ب هزرێن خەلکی دخوینن. وەک نموونە، بنێرە کوردان د ئەزموونا خوەیا تەڤگەرێن نەتەوەیێن کوردی دا، گەنگەشە ل سەر نموونێن سەرکەتیێن ژ دەرڤەی سینۆرێن خوە/ “کوبا، ڤێتنام، چین و…” دکرن، بەلێ د هەمان دەم دا، ل سەر نموونێن شکەستنێن ئەزموونێن کوردی/ “ژ شێخ مەحموود، تاکو قازی محەمەدی” نەراوستیاینە!
ئیرۆ ژی ل سۆسیال مەدیایێ بنێرە، مە چەند تیۆرزان و شرۆڤەکار ل سەر ناکۆکیێن رووسیا و ئوکرائینا هەنە، بەلێ هەمان ئەڤ بەرێزە ل سەر رەوشا کمباخا ناڤمالا کوردی و ناکۆکیێن دژوارێن هەڤلێر و بەغدا نائاخڤن. “هەروەکو کورد دبێژن، هەوە گێرە ژ خوە چێکرن، ڤێجا گەرا رووسیا و ئوکرائینایە!” مخابن ئەڤ شرۆڤەکارێن مە ژ دەرڤەی دلینی و کینێ، تشتەکێ بابەتی و دوورهێلی نکارن/ نزانن ل سەر پرۆژە و چارەسەریێن مالا کوردی و ئاستەنگێن هەڤلێر و بەغدا بێژن! ئانکو ل گۆر ڤێ رەوشا دیرۆکا مە تێرا دەربازبووی/ دەرباز دبیت، مە تیۆرزانەک سیاسی/ هشمەند نەبوویە، بکاریت رەوش و پێشهاتێن کوردان وەک “داڤەکرن، راڤەکرن و پێشبینی” بەرچاڤ بکەت. ب گشتی، ئارێشا هەرە سەرەکی، مە چ تیۆرێن سیاسی نینن، بکارین رەوشا خوە پێ هەڤسەنگ بکەین. ئەگەر ئەم کورد خوە دگەل فەلستینێ ژی، د هێلا هزر و تیۆرا شۆرشێ دا هەڤبەر بکەین، ئەم گەلەک هەژارین، هەروەک نموونە ل تەڤگەرا فەلستینێ بنێرە، چەند تیۆرزان “ناجی عەلوەش، نایف حەواتمە، جورج حەبەش، ئەحمەد بەرقاوی، وائێل حەلاق، غازی سۆرانی، ئیبراهیم ئەبراش، سەلامە کیلە، مونیر شەفیق و…” هەبوون.
ئەڤ رەوشا ئیرۆ گەلێ مە تێرا دبۆریت، دوورهێل و سیستەمەک رەشبین بەرهەڤکریە، کو ل هەردەرێ بێهیڤیبوونێ چادرا خوە ڤەدایە. ئێدی ئەڤ رەوشە دخوازیتە تیۆرزانەکێ سیاسی، نەک چالاکڤانەکێ سیاسی، داکو بکاریت نەخشەرێکا بیاڤێن گوهەرینێن جڤاکی، سەنتا گوهەرینێ و سروشتێ هلبژارتنێن بەردەست، وەک گرێکان داڤە و راڤە بکەت. وەک یا دیار، چاڤدێرێن مە یێن سیاسی، خوە ل هەمبەر ڤێ رەوشا دژوار لاواز دبینن، چونکو شیانێن نژنینا تێهزرکرنێن پاشەرۆژێ نینن. ب ئەنجام، رەوشا مە بۆ هەموو ئەگەران، تا شەرێن براکوژی و هلوشیانێ ژی یا بەرهەڤە! ئەڤ بێدادی و هەڤرکیا نە رەوایا د ناڤبەرا پێکهاتێن گەلێ مە دا دهێنەکرن، تەڤ دەرگەهێن وێرانکرنێ ل بەر پاشەرۆژێ ڤەدکەت. ب کورتی، رەوشا کوردستانێ/ باشوورێ کوردستان، ل بەر خوە دوبارەکرنا تراژیدیێن جەرگبرە!

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close