کرمانج هاریکی
چ جارا نەڤیایە ب بەژن و بالا چ کەسێن بەرپرس و خودان پلە و پایێن سیاسی و جڤاکی دا هەلدەم. هەمی مروڤا ب خراب و باش ڤە ئەز ب پیروز لێ دنێرم .لێ ناڤبری نزیکی سێهـ و شەش سالە ئەز وەکی کەس دنیاسم . ب روژانە هەر چەند ئەز د ئینم و دبەم داکو بکارم ل بالا خو دەربێخم. لێ ل بەر کاریگەریا وی یا روحی ل سەر هەستێت من ئەز نەکاریمە و نکارم وەکی سەربوریەکێ د ژینا من دا دەرباز بوی ژ بیر بکەم. مەزناتیا ڤی کەسی ل دەڤ من یا درژدیا بریارێن نەگور یێن وی دا ل سەر هزر و بیرێن خو یێن ئینسانی و هیوابەخشێن نەڤەشارتی.
ئەڤ مروڤە عەینی وەکی ستێرکا روژ ئاڤایێ یە هەر دەما روژ ل عەسمانی ئاڤا بو د عەسمانێ هشێ من دا یێ گەش و زەلال و قیت و درەوشاوەیە. یا ژ من ڤە نە هەر بو من بەلکی بو هەمی مروڤێن شورەشگێرێن کو ناڤبری دیتبیت و نیاسیبیت. ئەڤ سترێکا سومبولی وەکی سوارێ چواردی یا سێزدە سوارێن بادینان نە ل بن عەڤرێن عەسمانێ تەماوی یا کارەسات بارێ ژیانێ هاتیە وندابون ڤەشارتن. نە ژی د دەریا خەیالا ئاشوپی دا د هێتە خەندقین.
رەنگ و دەنگ و هزرێن هەردەم یێ نەگورێن هەڤال دوستی و مروڤ پەرستێ دلسوزیا هەڤرێبونێ د ڤی ناڤبریدا هەردەم د زیندی گەشی د وژدانا یێ هەمبەری خودا د ب گەشی دژیت. د جەوهەرێ خو دا درشتنا خلتەیێ بەرخوردا وی ل دەڤ من و تەڤایا ناسا ب حەز و نەحەزڤە باندورا خو یا کاریگەر هێلایە. کارتێکرنێن خو یێن هەستی و هشی ل سەر دەوروبەرێ خوە کرنە. هەردەم ئەو سەرمایە یێ کو ناڤبری هەی دلسوزی و راستگویی و هەڤالینا راستەقینە و ب باوەری بویە،
د هەمبەر یێدی دا یێ ب کار ئینای. ئەز باوەر دکەم چەند د جیهانا دوست و هەڤالبەندێت خودا یێ زێندی و ژ بیرنەکریە. هەروەسا د هشێ نەحەز و نەیارێت خودا ژی هەردەم وەکە هورە بایەکێ وژدان هەژێنە و تم ل وژدانا وان دایە و را دهەژینیت. ئەز
ناهێم ل سەر چونیەتی ل دایکبون و چاوانیا ژیانا وی و مالباتا وی یا پریڤات بنڤیسم. لێ وەکی ئەرکەکێ مروڤی و تێگەهێ هزری دێ دارەسیێمە سەر چاوانیا هشمەندی و هزرکرنا ناڤبری. کو ئەز دبینم تاکە ئەرکێ من تەنێ ئەوە ئەز د وی بوارێ هشمەندی و هەست و نەستێت وی یێن تولیرانس و سکولار و لیبرال باخڤم. ڤان سێ پەیڤێن دەولەمەند و ب داوی د بوارێ سوسیولوجی و پولوتولوجی فەلسەفی دا کاریگەریەکا دەولەمەند یێ هەی. هەرسێ پەیڤێن سەری چ راستەوخو یان ناراستەوخو پەیرەوێن هشمەندیا هێژا مەهدی تەلعەتینە.
بێ دودلی و پاشەکشەبون ناڤبری ژیانا خو بو وان هەرسێ تێگەهێن پێتڤی یێت ژیانا پێشڤەرویا مروڤایەتیێ تەرخان کری. ئەڤ جیهانا بلند دا ب شکلەکێ نا ئەکادمی و هەرهویی ل دەڤ مەهدی دروست بوی یێن بویە پرێنسیپێن ل سەر دارشتنا ژیان و بەرخورد و هەلویستێ وی. ئەڤ تێگەهشتنا بلندا ئەنتی لاهوتی مەهدی یێ نەچاری هندێ کری کو هەردەم د پێخەمەتی تێگەهێن مروڤی یێن بلند خو بکەتە پر و جڤاکا خو وەکە کولەکتیڤ و کەسێن دەوروبەرێن خوە وەک ئەندیڤیدوێل د سەر خورا دەربازی جیهانا سەرکەتن و پێشکەتنێ و بەختەوەریێ بکەت.
مەهدی تەلعەت وەکی هێزەکا خوداوەندی یا ب خو باوەر و نەگور هەردەم د هشێ خو یێ مروڤی دا مروڤەکێ ئاڤا و وەلاتپارێزە هەردەم د خزمەتا نەتەوێ خودا وەکی سەربزەکێ ون ل سەر هێلا سورا تێکوشانێ بویە. هەستا وی یا نەتەوەی و مروڤایەتی یا ب بارێ بندەستیا گەلێ وی ڤە گرێدایی بویە. شان ب شانی مروڤایەتیێ د پێخەماتیا مروڤدوستیێ دا د مەیدانا تێکوشین و خەباتێ دا نە هەر تنێ درێغی نەکریە، بەلکی د هەڤچەرخیا خودا یێ بێ میناک بویە.
هەردەم د پێشەنگیا خو گوریکرنێ و قوربانیدانێ دا بویە. بویە پرانیا مروڤێن کەڤنەشوپ و خوپەرستێت ئیگوئیست لێ ترسیانە. بویە بارگرننیەکا دەرونی بو مروڤێن بەرپرس و بەرژەوەند پارێز. ڤێ دەستەیا گەندەلا بیانی پەرست هەردەم مەهدی ب هەرەشە ل سەر ژیانا خو و هەست و بیر و باوەرێن خو دیتیە. نێرینا وان بو ناڤبری ب نێرینەکا نەحەزانە یا هەڤرکیا مان و نەبونێ بویە. ترس ل هەبونا جەسەدی یا مەهدی نەبویە هندی ترس ل مرن و شەهێدکرنا وی کریە.
چمکی ب هەر دەستدرێژیەک ب سەر مەهدی دا بیتە بومبەکا ئەتومی دا ب رویێ کەڤنەپەرست و هەڤبەندێن داگیرکەرا ڤە پەقیت. لێ خوراگری و هێزا باوەری ب خوبونا ناڤبری گەلەک ل هندێ مەزنتر بویە کو نەحەزێن وی بکارن رێرەو و رێبازا هشمەندیا وی یا تێر مروڤایەتی سکولارستی بگوهرن. د مەیدانا هەڤرکیێ دا مروڤەک عیناد و نەترس و راستگو بویە.
چاڤ نەترسیا وی رەنگڤەدانا بیروباوەرێن وی بونە رێبازا پێشکەفتن و گورینا جڤاکێ بەرەڤ ئاسویێ خوشبەختی و کەرامەتا مروڤایەتیێ. لەورا ماندیبون د کەلتورێ مروڤێ شورەشگێر یێ وەکی مەهدی تەلعەت دا نەهاتیا ئاشنا بون. هەردەم یا نامو و دورە کەسایەتیا ناڤبری بویە. خواندن گەها پەروەردەکرنا هزاران خەباتکەر و شەهیدێن کوردستانێ بویە .
نان دان و خوانەدانی ل گور شیانێت خو یێن سەردەم و جهێ لێ ژیای ئێک ل خو و سەخلەتێت ناڤبری بویە. نە هەر بو دوست و خزم و ناسیارا یێ سفرە ڤەکری و سەخی بویە بەلکی بو هەمی کەسێن روی تێکری هێلانە و مەئوا بویە. جیهانا بلندا رەوانی هەر مەمی مروڤێن شورەشگێر و خودان هەلویستێت مروڤایەتی تێدا د ئاشنا بونە. ژ بەر هندێ ژی مەهدی و مالباتا خو بو هەمی مروڤدوستەکێ و پێشکەفتی خوازەکێ تەکیا و خانەقا بویە. ب نانێ خو ڤە هەردەم نە کێمی حەتەمێ تایی بویە. مێرانی و مەردەمێری و دلسوزی فیداکاری ئەو سەخلەتێت نەگورێن هەڤال مهدی تەلعەتینە.
