رۆژه‌ڤكوردستانینێرین

پارتێن کوردستانی ئاریشا هەری مەزنا دوزا کوردی یا ڤی سەردەمینە!

محمەد چەلکی

     ئێ ب خودێ سەرکردێن پارتێن کوردی دلێ مرۆڤی ژ هەر تشتی ڕەشکریە. پرانیا پارتێن کوردی ب درویشمێن وەک ئێک د بریسقەدار و سەرنج ڕاکێشن. درویشمێن وەک ئازادی، دیمۆکراتی، دادوەری، وەکهەڤی و لیستەکا درێژ یا ناسناڤێن وەک پارتا نەتەوی، پارتا دیمۆکرات، پارتا زەحمەتکێشێن کوردستانی، یا کارکەر و خەباتکارێن کوردستانی. لێ ئەگەر ل پێکهاتە و سەردەریا وان هەموو پارتان بۆ کێشێن ئازادی، دادوەری، وەکهەڤی، نەتەوایەتی، پێکڤەژیان و هەڤپەژراندن و پێشکەفتنێ مێزە بکی دێ بینی ئەڤ پارتە گشت ژ دویریا عەرد و عەسمانا و بلندکرنا وان درویشمەیان ژ هەڤ دویرن، نە دیمۆکراتن، نە سوسیالستن، نە دنەتەوینە، نە و نە و نە ئانکو چ سیفەتێن پارتێن سەردەم ل جەم پەیدا نابن.

     تەڤایا پارتێن کوردستانی تنێ ناڤن و ژ ناڤەرۆکەکا سەردەمیانە دڤاڵەنە، لەوا سیاسەت ل دەف مە بوویە گێول و هەر تشتێ سەرۆک یان سکرتێرێ پارتێ بخازیت دێ ئەو بت و گۆتنا وی نابت دوو. ژ بلی کێشا داگیر بوونا ئاخامە و دەک و دولابێن دوژمنان پارتێن کوردستانی بوونە ئاریشا هەری مەزنا نەتەوا کورد.

     دبت گەلەک ئەڤێ دیدا من نەپەژرینن، مافێ وانە لێ ئەگەر ل دیرۆکا ڤان پارتان و شێوێ سەردەریا وان بۆ تەڤ کێشێن مە و پرسا ئازادی، دیمۆکراتی، هەڤپەژراندن، کێشێن جڤاکی ب تایبەت پرسا ئازادیا ژنێ و ئولی دێ بینی نەک نە بوونە پرس بەلکو هەما پشت گوهڤە هاڤێتنە. لەوا هەلامەتێ شەرێ ناڤخوە(برا کوژی) هنداڤی جڤاکی یێ چکلاندیە ژبلی رێککەفتنێن نهێنیێن وان دگەل داگیرکەرێن کوردستانێ ل دژی هەڤ.

پارتێن کوردستانی دگەل دوژمنێن کوردستانێ دڕێک و دگەل پارتێن کوردستانی هەڤڕکن و سەردەریا دوژمنی دگەل هەڤ دکەن.

     ل پێکهاتەیا هەر پارتەکا کوردستانی مێزە بکی ب چەپ و ڕاستڤە دێ بینی پارتێن سەرۆک پەرێسن و گوهارتن د سەرکرداتیێ دا ناهێنە کرن، ژ بلی ڤێ چەندێ ژی کا سەرۆک چ دخازت هەر ئەو دهێتە کرن و ئاخفتنێن وی دبنە دستوور!! هەلبەت ئەڤ رەنگ سەرکرداتییە نکارت ل بەر لێهمشتا گوهۆڕینان ئەوێن د هزر و دیدێن سەردەم دا دهێنە کرن، خوە بگونجینن و دبنە رێگر کو گوهۆڕین پەیدا ببن. ژ بەر ڤێ چەندێیە دبێژم پارتێن ڤی سەردەمێ مە بوونە سنگرە و ئاریشە د رێکا پێشکەفتنا مللەتێ کورد و دوزا وی دا نموونا هەری نێزیک ئەڤرۆ(٥-٣-٢٠٢٢) ل هەولێرێ محمەدی حاجی مەحموود دووبارە هاتەڤە هەلبژارتن ب سەرۆکێ پارتا سوسیالیستا دیمۆکراتا کوردستانێ و برایێ وی ب جهگرێ وی هاتە ئەرکدارکرن!!

هەلبژارتنا محمەدێ حاجی مەحموودی ل دویف چ پرەنسیبێن پارتێن سوسیال دەمۆکرات نەهاتیە هەلبژارتن هەروەسا پارتا وی ژی نە سوسیال دیمۆکراتە بەلێ محمەدێ حاجی مەحموودی ناڤ ل ڤێ پارتا بنەمالا خوە کرییە! هەلبەت پرانیا پارتێن کوردستانی بەرەف بنەمال بوونێ چوونە و هەر ئەڤەیە ئاریشا بنگەهینا دوزا کوردی و سەدەمێ زڤرینا دوزا کوردیە ل جهێ خوە و ل دوور بازنا بۆش.

     بێی دوو دلی مرۆڤ دکارت بێژت پرانیا پارتێن ئەڤرۆ ل کوردستانێ خوەدی هێز و د قادا خەباتێ دا کار دکەن، پارتێن بنەمالی و دژی پرەنسیبێن دیمۆکراتی، ئازدیا هزرێ، مافێن وەڵاتیبوونێ، مافێن ژنێ، دادوەریا جڤاکی، پێکڤەژیان، هەڤپەژراندن و هەر سیمایەکێ بهای بۆ تاکی ڤەدگەرینیت.

     هندی پارتێن کوردستانی خوەدی ڤێ جیهانبینیێ بن، مەحالە گوهۆڕینێن ئەرێنی پەیدا ببن و دوزا کوردی بەر ب نوی بوون و سەردمیانە بچت، خەبات ژ خەباتا کلاسیک بەرەڤ سڤیلبوونێ بچت، ئەڤجا پارتێن کوردی چ ناڤ ل خوە بکەن و چ درویشما بلند بکەن، چ ژ پرسێ ناگوهۆڕیت.

٥-٠٣-٢٠٢٢

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close