نووچه‌

پڕسگرێکا ھەلبژارتنا سەرۆکی و پەیامێن دۆزەخی


جاسم محمد شرنەخى

باوەرە هەڤیرێ پڕسگرێکا هەلبژارتنا سەرۆک کۆمارێ عیراقێ دێ گەلەک ئاڤێ ڤەخۆت، ئەڤ جارە پتر ژ هەمى گەڕێن بوورى کاراکتەرێن لەیزتنا سیاسى ژ بۆ ڤێ پرسێ ھاتنە مەیدانێ، یێن كەڤن ژى داخوازیێن خوە دژوارتر لێکرینە، زێدەتر ژ جاران پێداگیر و ڕژدبووینە؛ لەوا ڕەوشا ڤێ کریارێ ئاڵۆزتر و ب زەحمەتر لێ هاتیە. کارەکتەرێن ناڤخۆ کا چەند زۆرن و ژ ئەگەرێ وێ یەکێ جەمسەریەکا دژوار و خراپ چێبوویە، لێ فشار یان ژى باشترە بێژین: دەستناڤداکرنێن دەرڤەیێن ڕاستەڕاست و سۆربسۆر یێن هەریمی و نیڤدەولەتى گرانترن و کاریگەرترن، جەمسەرگێریا سیاسى کێشە گەهاندیە شەرێ هەستى شکاندنێ. ڕۆژنامەڤانەکێ عیراقیێ مەزن ئەڤ چرەبکێش و ملمانەیا نها دناڤا هێزێن سیاسیێن عیراقى و دەرڤەدە هەى وەکى لەیزتۆکا پەیسک و ماری وەسف کریە، هەر ئێک ژ هەردۆ جەمسەرێن هەڤڕک: پشتەڤانێن بەربژێرێ یەکێتى و لایەنێ دیتر هەڤپەیمانێت پارتى و بەربژێرێ وێ، ئەو ب دەڤێ ماڕێ خوە دکارت – لایەنێ هەڤڕک ژ بەر دەرازینکا ئەرمانجێ داعویرت و بهینت خوارێ بگەهینت (أسفل سافلین)، هەر چ نەبت ئێک ژوان ب (زۆرینەیێ) و یێ دیتر ب (سێکا کارخستکەر) ئانکو ڕێگر، یا ب عەرەبى دبێژنێ: (الثلث المعطِّل)، ئەڤ (سێکە) بۆيە شیرەک ددەستێ یەکیتى نیشتمانى کوردستان و چارچۆڤێ هەماهەنگى (الإطار التنسيقي) ب سەرکێشیا مالکى و هەڤالێن واندە، ل هەر دەمەکێ ب ئاسانى دکارن ڕێگریێ ل دەنگدانێ ژبۆ بەربژێرێ پارتى بکن؛ ئەو ژى ب بریارا بایکۆتا ڕوینشتنا پەرلەمانى یا دەنگدانێ، ئەڤ چەندە پشتى بڕیارا دادگەها فیدارلى یا تایبەت ب شرۆڤەکرنا ماددێ (70/یەکەم) ژ دستۆرى بۆیە چەکەکێ کارتێکەر، دادگەهێ ئامادەبوونا دوو ل سەر سێ ژ ئەندامێن پەرلەمانى کرە مەرج ژبۆ شەرعییەتا دەنگدانێ. ئەڤا بۆرى ئێک ژ چەکێن شەریینە لێ هەلبەت نە بتنێ یە، کاراکتەرەکێ دەرڤە یێ بهێز پەیامێن زۆر ئاشکەرا و دژوار یێن وەکى ئاگرێ دۆزەخێ بەردەوام دهنێرت، ئەڤ چەندە پاش چەند هۆشدارى و گەفێن زاراکیێن ڕاستەڕاست د سەرەدانێن خوەدا ژبۆ لایەنێن سیاسى هاتەکرن، بەلێ تشتێ سەیر ئەوە: هندەک مەزنە سیاسەتمەدارێن مە هیچ حەسێبەکێ بۆ ناکن، خوە تێناگەهینن و پەیامێن بەحسێ وان بۆرین پاشگوهـ دکن، جارێ دا پێکڤە پەڤخستنەکا (سەردەکا) بلەز ل زنجیرا وان پەیامان یەک ل دۆڤ یەکێ بکین، دا بزانین چەند کارلێکەرن: 1ـ بومبەبارانکرنا هندەک جهێن ژێ گرتى: و ژوان ئۆفیسا جێگرێ سەرۆکێ پەرلەمانى (شاخەوان عبد الله) ل کەرکۆکێ ل رۆژا 19/1/2021، دیسان بارەگایێ سەرۆکێ پەرلەمانى (محمد حەلبۆسى) ل باژێرێ ڕەمادى ل 25-1-2022. 2- بریارا دادگەها فیدرالى ژمارە: (16 اتحادية/ 2022) گرێدای شرۆڤەکرنا ماددێ (70) ژ دستۆرى ل ڕۆژا (3/2/2022) ئەوا بەحس ژێ هاتیە کرن. 3- بريارا دادگەها فیدرالى (17 اتحادية/ 2022) تایبەت ب دويرخستنا هوشیار زێبارێ ل 13/2/2022 ب تۆمەتا گەندەڵی و ڕژاندنا (هەدرا) مالێ گشتى. 4- بریارا دادگەها فیدرالى: (59 /اتحادية/و 110/اتحادية) ل رۆژا 15 /2 /2022 تایبەت ب حکومکرنا نەدەستۆریا یاسایا نەفت و گازا هەرێمێ یا ژمارە (22) ل سالا 2007. 5- بڕیارا هەمان دادگەها بۆرى ل 1/3/2022 ب نەدەستۆریا سەرژنوى ڤەکرنا دەرگەهێ خۆکاندیکرنێ ژلایێ سەرۆکێ پەرلمانیڤە، دادگەها ناڤبرى دۆپات کر: ” تەکستەکا یاسایی یانژى دەستۆرى نینە ڕێکێ بدت سەرۆکێ ئەنجۆمەنێ نوێنەران ب چێبۆنا ڤەکرنا دەرگەهێ خۆبەربژێکرنێ ژبۆ پۆستێ سەرۆک کومارى”. هۆسان پشتى ماوەیەکێ درێژ ژ مورتاحى و بێهنڤەدانێ دادگەها فیدرالى ب شۆل ئێخستن، و وەکى بەشەک ژ شەرێ سار و کەرەستەکێ ململانەیا سیاسی کەفتە کارى. ب ڤى دەست و دارى پڕسگرێکا هەلبژارتنا سەرۆکێ عیراقێ ل شۆنا ببتە دەرگەهـ ژ بۆ کریارێن پرۆسیسا سیاسى و چێکرنا حکۆمەتێ ئەو بۆیە ئاستەنگا ھەرە مەزنا رێکێ، د ئاینەیێ نێزیکدا چ نیشان ژبۆ دەرزڤەبۆنا ل ڤێ پڕسگرێکێ خوەیا نابن. ب دیتنا من ئەڤ پڕسە دێ گەلەک دەمێ خۆت، بارێ عیراقێ ب ڤێ قەیرانێ دێ گەلەک گرانتر لێ ھێت، بیێ سازانەک د ناڤبەرا کاراکتەرێن مەزنێن نێڤدەولەتی و ناڤچەیی چارە ناھێت.. واللە أعلم.

پتر به‌رچاڤ بكه‌
Back to top button
Close