عارف سادق
ب گشتی کوچ ، بێکوڵا مروڤانە ، بو دەڕبازبون ژ جێھێن شەڕ دگەھیتە ناڤا گوند و باژێڕان..
چێدبیت مێژویا باراپتر ژ گەلێن دنیایێ یا دیاربیت ، بەلێ یا کوردان چ مێژوونڤێس نەشێن وێ مێژویێ دیارکەن!
ھەروەکی شاعرێ نەمر شێرکو بێکەس دبێژیت:”لەوەتەی کوچ ھەیە من کوچ دەکەم…
من پێش مەسیح لە خاچدراوم”ھەرھوسا شێوازێ کوچا کوردان ، وەکی یا چ مللەتان نینە!یا ساڵا 1991 لبیرا مەیە و ئەم دناڤدا ژیاینە !
دناڤ سڕ و سەقەمێدا ، لبن شڕکێن بارانێ ، ب درێژاھیا سەدان کیلومەترا ، ل ناڤ دوڵ و نھاڵا ، ڕەڤین بو چارەنفێسەکێ نادیار!بێ نان و ئاڤیێ ،گەلەک خەلکی زاڕوکێن وان لێ ببون بەڵا ، دانعەمر دڕەوشەکا گەلەکا دژوار دابون ، باراپتر ئان بڕێڤە وەغەرکرن ئان پشتی ھینگێ!
ھندەگ چیڕوک دھاتنە گوتن ، مویێت سەرێ مروڤی قژ دبون!
دەولەتێت دەوروبەر(تورکیا و ئیران) ب چاڤێ دوژمناتیێ مێزەدکرە خەلکێ کورد!چ ڕێکخراوێت مروڤاتیێ و UN دھەوارا خەلکی نەھاتن ئان درەنگ گەھشتن!
کوچا ئوکڕائینیا ، مروڤ ڕوژانە د شاشێن TV دا دبینیت !ڕاستە کوچ ھەر کوچە ، ھەکو مروڤی ماڵ و حال و وەڵاتێ خو ل دویف خو ھێلان ، قەدەرا مروڤی یا دیار نینە!
بەلێ ھەڤبەرکرن ناھێتەکرن دناڤبەرا ھەردوو کوچاندا!ل چاڤ کوردان ، تو دبێژی ئوکرائینی یێ دھاتینە
گەشت و گوزارێ!باراپتر ژوان ، ئان ب پاسان ئان ب شەمەندەفڕان ، تێنە ڤەگوھاستن بو دەولەتێت دەوروبەر!ب ھزارن کەسێن خوبەخش ، ل ناڤا ئەڵمانیا و ل سەر توخیبان ، ل بەندا کوچبەرێن ئوکرائینینە ، بو ھاریکاریێ و پشتگیریێ!پشتی ھینگێ ئەو دئازادن ، کا کیژان وەڵاتی ھەلبژێرن!
بو دەمێ سێ سالێن بھێن ، ل ئەڵمانیا ژیانا وان یا مسوگەرە و مافێ کارکرنێ یێ ھەی ، وەکی ھەر ھاوەڵاتیەکێ ئەڵمان!
ھەر ل سنوری ، پشکنینێن ساخلەمیێ ، بو کوچبەرێن ئوکرائینی تێنەکرن!
پویتەکا مەزن ب زاڕوکان و دانعەمرا تێتەکرن ، ژبلی دابینکرنا خارنێت باش و جلکێت گەرم!
گەلەک ژ وان (سە و پشیکێت) وان یێ دگەل ، ئەوژی ژ لایێ تەندروستیێ ، تێنە پشکنین و ھەمی پێتڤی بو تێنە مسوگەرکرن!
تشتێ جوان ل دەڤ وان ، ئارامی و گەشبینیە ، مروڤ گەلەک کێم گەنجا و زەلاما دبینیت ، ھەچیێ بشێت چەکی ھەلگریت یێ مایە ل وەڵاتێ خو ، بو بەرەڤانیکرنێ بەرامبەر لەشکرێ ڕوسی!
کورد ژ مێژ ، قوربانیێت مێژوویێ و سیاسەتا نیڤنەتەوینە ، ھەرھوسا فاکتەرێ ناڤخویی و عەقلیەتا خێلەکیێ و کورفامیێ!
ئوکڕائینی قوربانیێت ، دەبەنگیا سیاسی و جیوپولوتیکا وەلاتێ خونە…
