ئەحمەد زاویتەیی
1- ڕاگه‌هاندنا كوردی:
هنده‌ك پێزانین یێت دادگه‌هێنه نه یێت ڕاگه‌هاندنێ نه!! مخابن ل نك مه هه‌می پێزانین دبنه یێت ڕاگه‌هاندنێ ڤێجار رۆلێ دادگه‌هێ وده‌زگایێت ئه‌منی به‌رزه دبیت!!
بۆ نموونه كوشتنا كه‌سه‌كی، به‌رزه‌بوونا زارۆكه‌كی، دزین، ماددێت بێهۆشكه‌ر، خۆ كه‌شتن.. وگه‌له‌ك وه‌كی ڤان رویدانان.. ته‌فاصیلێت وان نه یێت ڕاگه‌هاندنێ نه یێت دادگه‌هێنه وجهێت ئه‌منی.. ئه‌گه‌ر بوونه یێت ڕاگه‌هاندنێ.. وێ گاڤێ دێ بیته پشته‌ڤانی وته‌شجیع كو ئه‌ڤ ڕه‌نگه رویدانه زێده ببن!!
دبیت هنده‌ك به‌رنامێت ڕاگه‌هاندنێ، هنده‌ك بسپورێت نه‌هێلانا ڤان رویدانان مێڤان ببن بڕه‌نگه‌كێ به‌رپرسیارانه بێنه به‌حسكرن بۆ نه‌هێلانا ڤان رویدانا.. نه ووسا بێنه رۆمالكرن كو ببیته پشته‌ڤانی بۆ زێده‌بوونا ڤان رویدانا بێی ئه‌م بخۆ پێ بحه‌سی یێن بهێجه‌تا ئازادی یا ڕاگه‌هاندنێ!!!
ئێك ژئه‌گه‌رێ زێده‌بوونا ڤان دیارده‌یا ئه‌وه ئه‌ڤ ڕویدانه بووینه به‌حسێ ڕاگه‌هاندنێ وسوشیال میدیایێ..
ئه‌گه‌ر سوشیال میدیا كوردی نه‌با حاكم گۆران ل وه‌شانا ئێكسه‌ر خۆ نه دكوشت!! (دویر ژئه‌گه‌رێت سیاسی ل پشت ڤێ رویدانێ)ئان ئه‌گه‌ر ڕاگه‌هاندنا كوردی نه‌با وی هاولاتی یێ رۆژئاڤا خۆ ل سه‌ر جاده‌كا گشتی ل هه‌ولێرێ ئاگر نه دبه‌ردا خۆ.. (دیسان دویر ژئه‌گه‌رێت سیاسی)
ڤه‌گۆهاستنا ڤان ڕه‌نگه رویدانا دبنه ئه‌گه‌ر بۆ زێده‌بوونا وان..
هه‌روه‌سا به‌حسێ ماددێت بێهۆشكه‌ر.. یان خۆ كوشتنێ.. یان هه‌تا كوشتنا ئافره‌تان.. یان ئه‌ڤ كوشتنا ب سانه‌هی ل سه‌ر جاددا ب شه‌ڤ ورۆژ.. هتد..
دڤێت به‌رنامیت ڕاگه‌هاندنێ بێنه دانان بۆ نه‌هێلانا ڤان دیارده‌یان.. نه رۆمالكرن بتنێ بۆ رۆمالكرنێ!!هنده‌ك بابه‌تێت رۆمالینا ڕاگه‌هاندنێ دبنه مه‌ترسی سه‌ر ئه‌منا نه‌ته‌وه‌یی ونشتیمانی.. دڤێت ڕاگه‌هاندن یا ئاگه‌هدار بیت.. ئه‌و بابه‌ت نه یێت رۆمالینێنه!!
ل ئه‌مریكا وه‌ختێ سه‌روك ترامب بوویه مه‌ترسی سه‌ر ئه‌منا نیشتمانی یا ئه‌مریكا فێسبوك وتویتر وچاڤپێكه‌تنێت ڕاگه‌هاندنێ ژێ برین!
2- ئۆپوزسیون ل كوردستانێ دناڤبه‌را دوو تشتا نا ئێته ژێك جوودا كرن:
ده‌سه‌ڵات و كوردستان!!ده‌سه‌ڵات جوودایه ول كوردستانێ ده‌سه‌ڵات یه‌عنی هه‌ردوو پارت (پارتی وئێكه‌تی) دێ زۆلمه‌كا مه‌زن كه‌ین ئه‌گه‌ر نه‌ڤیانا پارتی وئێكه‌تی ببیته ئه‌گه‌ر كوردستان وهه‌رێما كوردستانێ وئه‌زموونا كوردستانێ مه نه ڤێت!!
ئان ڕاوه‌ستانا دژی ده‌سه‌لاتێ وه‌كهه‌ڤ بكه‌ین ب ڕاوه‌ستانا دژی ئه‌زمۆنا هه‌رێما كوردستانێ..
باشه ئه‌گه‌ر هنده‌ك هێزێت ئۆپۆزسیونی ل كوردستانێ ووسا هزربكه‌ن كو كێشه‌یا وان دگه‌ل ده‌سه‌ڵاتێ دێ ل به‌غدا ئێته چاره‌سه‌ركرن بۆ نه‌هێلانا ده‌سكه‌فتی یێت هه‌رێما كوردستانی سۆباهی ئه‌گه‌ر وان لایه‌نان كێشه ل گه‌ل به‌غدا هه‌بوو كی دێ كێشا وان لگه‌ل به‌غدا چارسه‌ركه‌ت؟!! وبۆ زانین كێشه ل گه‌ل به‌غدا دپاشه‌رۆژی دا دێ وه‌كی ئاڤ ڤه‌خارنی هند یا بسانه‌هی بیت!!
ئه‌گه‌ر ئه‌ز دژی ده‌سه‌لاتێ بم ل كوردستانێ ونه‌شیامێ، دورسته خۆ ب به‌غدا بهێز بێخم بۆ دژی ئه‌زمۆنا هه‌رێما كوردستانێ وده‌ستكه‌فتی یێت هه‌رێما كوردستانێ؟!!!
ڕاوه‌ستان دژی ده‌سه‌ڵاتێ وپێكول كرن بۆ چاره‌سه‌ری یێ وگۆهرینێ دیارده‌یه‌كا ته‌ندروسته دهه‌ر جڤاكه‌كی دا، لێ نا بیت ئه‌و هه‌لویست دگه‌ل ده‌سه‌ڵاتێ ببیته ئه‌گه‌ر دژی كیان وئه‌زمۆنا كوردستانێ براوه‌ستم ئه‌گه‌ر ئه‌ز نه‌شیامه ده‌سه‌ڵاتێ.
3- ده‌سه‌ڵات
ل ڤێرێ ئاخفتن بۆ ده‌سه‌لاتی ژی یه.. كو نابیت ناكوكی یێت نافخۆیی بكه‌ته ئه‌گه‌ره‌ك ئه‌زمۆنا كوردستانێ ب كه‌فته دمه‌ترسی یێ دا، دڤێت ل هنده‌ك قویناغێت شه‌رێ خۆ ل گه‌ل ئوپوزسیونێ یان ركابه‌رێت خۆ یێت سیاسی بێته ئاشی هویر وهنده‌ك ته‌نازلا ژی بكه‌ت ژبه‌ر ئه‌ڤ ئه‌زمۆنه بێته پاراستن..
ئه‌گه‌ر گه‌می كون بوو هه‌می دێ خه‌ندقن!!
ئه‌ز ب خۆ ڤی سێگوشه‌ی (ده‌سه‌ڵات + ئوپوزسیون + ڕاگه‌هاندن) گونه‌هباردبینم سه‌ر ڕه‌وشا ئه‌ڤرۆ هه‌رێما كوردستانێ گه‌هشتی یێ!! ده‌سه‌ڵات وه‌ختێ نه شێت چاكسازی یێ بكه‌ت.. ئوپوزسیون وه‌ختێ نه‌زانیت ونه‌شێت گۆهرینێ بكه‌ت.. وڕاگه‌هاندن وه‌ختێ نه‌زانێت رۆمالینان بكه‌ت..
وئه‌ڤ سێگوشه گونه‌هباره كو:
هاولاتی یێ كورد ل هه‌رێما كوردستانێ پتر بیت ژهاولاتی یێ (عیراقێ وسوریایێ ویه‌مه‌نێ وده‌وله‌تێت دی یێت ده‌ڤه‌رێ) وه‌ختێ سه‌ر توخیبێ بیلاروسیا وپوله‌ندا دره‌ڤین ژكوردستانێ!!.. وژهه‌می هاولاتی یێت ده‌ولتێت ده‌ڤه‌رێ پتر بیت وه‌ختێ دده‌ریا دا دخه‌ندقن وه‌ك ڕه‌ڤین ژكوردستانێ.. پرسیار ل ڤێرێ پا كی دێ خۆ كه‌ته خۆدانێ كوردستانێ!!
جاره‌كا دی دی بیژم:ئه‌گه‌ر گه‌می كون بوو هه‌می دێ خه‌نقن!!
