كوردستانینێرین

سەرکردێن مە سۆفی ئومەرن

شەبان مزوری

زۆر جاران ڤان سالێن دوماهیێ من هزرا خوە دکر بوچی خەلکێ مە هەز بو وی کەسی هەیە یێ ژ دەرڤەی کومێ یاریێ دکەت و سەرکێشیا کومێ دخوازیت بکەت؟ سوفی ئومەر بو زۆر خەلکێ مە نیاس بسەرکێشانا گوڤەندێ، یێ کو بەری پتر ژ سالەکێ ب نەخوشیا کورونا مری کو بمن نوکە لبەهەشتێ یە ئەگەر هەبیت. سوفی ئومەر مە دیت هەردەم لسەرێ گوڤەندێ بو، لێ پرانیا دەمی گوڤەندەک لدویف ئارەزویا خوە دکر، پرانیا جاران دەستێ هەڤالێ لکێلەکا خوەژی نە دگرت، هەمی دەمێ ژ دەرڤەی کومێ هندەک لڤلڤین دکرن کو سەرنجا خەلکی بو خوە دکێشا. پرسا رەوا لڤێرە گەلو کەسێ سەرچەمک ڤێ بیت مانە سەرنجراکێشە بو هەرکسی؟

سەرنجکێشانا خەلکی هەردەم نایێ وێ رامانێ کو مروڤ کارەک باش دکەت، ژمێژدا ئەم دوزانین کو پرانیا مروڤێن لناڤ هەمی گەلاندا کو سەرنجراکێشن کەسانێن پر بێ بوهانە. چونکە هەر کەسێ ژدەرڤەی کومێ جهێ سەرنجراکێشانێ یە.  لێ لڤێرە دڤێت بێژم کو دەرکەفتن ژ کومێ کارەک شاشە، چونکە ئەگەر ئارمانج ژ دەرکەفتنێ یان بێژین یاخیبونێ ئەو بیت کو مروڤ هزر و هەلویستێن خوە بکەسێن هەمبەر بدەت نیاسین کارەک رەوایە و دڤێت مروڤ بکەت.

یاخیبونا بەشەک ژ مروڤا کو بریاردەر نینن دیاردەک تەندوروستە ژبو بکارن سەرنجا خەلکێ بو خوە راکێشن، نیاس بکەن لگەل بوچونێن خوە، نیشان بدەن خەمخوریا خوە بو پرسێن رۆژەڤێ و پرسێن ستراتیجی د کومەلگەهێ دا. هەمی یاخی بونەک کارڤەدانەک تەندوروستە هەیا ئەگەر د کوکا خوەدا ئەو کەسێن یاخی د بوچونێن خوەدا شاشبن. رەنگەک هەلسەنگادنێ بریاردەست لسەر کەسێن یاخی ددەن و ئەوژی بێگومان کەسێن یاخی بهەمی شێوەکی کرێت دکەن لبەر چاڤێن خەلکی وەک ( تێکدەر، کرێگرتی، دوژمن، خوەفروش…هتد ) یانژی ئەگەر پر جامێر بن کەسێن دەستهەلاتدار د بێژن ئەڤ کەسێن یاخی ساویلکن. راستیا بوچونا یاخیا و هەر کەسەکی ئاشکرا دبیت پشتی دەرباس بونا دەمەکی، ئانکو گوتنا تو شاشی ئەز دوروستم پرانیا جاران پێویست  بدەمەکی هەیە ژبو زەلال بیت.

ئەم ڤەگەرین سوفی ئومەر بێگومان ویژی بمن ماف هەیە وەک هەر کەسەکی یاخی ببا، ئەگەر سەرچەمک نە گرتبا. کەسێ سەرچەمکی دگریت نابیت هەمی تشتەکی لدویف هەز و داخوازا خوە بکەت. بەلکو دڤێت برەنگەکی سەرچەمکی بگریت کو هەز و داخوازێن هەمی داوەتیا لبەر چاڤ بگریت. لێ دەما سیاسەتمەدارێ مەیێ خوە بپێشەنگ دزانیت هەمان رەفتارا سۆفی ئومەر بکەت. زۆر جاران دێ بینین خەلکێ لدویف دلێ سۆفی ئومەر گوڤەند گەرم کر لێ هێشتا ئەو جوش نەگەهشتی هەمی گوڤەندێ دێ بینی سوفی ئومەر سستکر یانژی لڤلڤینەک کر کو ژبلی ببیتە بێترانکێ خەلکێ تشتەک دی پێشکەش ناکەت وێ دەمێ مە هیچ کەس نامینیت خودان دیتن و خەلکێ بێی دلێ وان خوە مشەخت دبینن، ئەڤ هەستا مشەختبونێ بو خوە سەرەتا یاخیبونێ یە. چونکە بێ دودلی بمن مروڤێ یاخی دخوازیت سەرچەمکی بگریت و گوڤەندێ ئەو ژی لدویف دلێ خوە بگێریت. لەوما پرانیا جاران مروڤ دبینیت کو بەشەک ژ کەسێن یاخی هەمی تشتەکی لسفرێ ددەن. لێ پرس ئەڤەیە کێ بەری کێ یێ دی لسفرێ دایە؟ دەستهەلاتدارن یان کەسێن یاخینە؟ کیە کەسێ یاخی گەهاندی یە وێ رادێ کو بێژیت بەهشتا من پار تێ نە بیت بلا کەر و گولک لێ بچەرن؟ کیە کەسێ یاخی گەهاندیە وێ قوناغێ کو تەر و هشکا پێکڤە بسوژیت؟ ئەڤ پرسەنە بێ بەرسڤ ماینە لدەف مە.

بکوردی و بکورتی سەرکردە دڤێت مایسترو بیت ژ هەمی دەنگا ئاوازەک سەرنجراکێش و جوان دەربێخیت و نە تەنها دەنگێ خوە لسەر هەمیا بسەپینیت.

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close