رۆژه‌ڤكوردستانینێرین

نەورۆز ژ ھیمایەکێ مەزن بەرەڤ دیکۆرسازیێ

جاسم محمد شرنەخی

چەند ڕەهێن نەورۆزێ د ناڤ جیهانێدا کویر وبەڵاڤن!، گۆرەى هندەک ڕاپۆرتێن تایبەت ژمارەیا وان کەسێن ڕۆژا 21- ئادارێ وەکو جەژنەکا نەتەوەیى یان ژى ئاینى دگێڕن خوە ل (400) ملیونان ددن، ژوانا گەلێن ئاری و نە ئارینە وەکى : (کورد، فارس، پشتۆن، ئازەر، خەلکێ: تركمانستان، تاژيكستان، ئوزبەكستان، قرغيزستان، كازاخستان، مەقدونيا، ژێریا قەفقاز، هەرێما بەلقان، كشمیر، باکۆرێ رۆژئاڤایێ چینێ، و چەند مللەتێن دیترێن رۆژئاڤایێ ئاسيا) ژ بۆ گەلێ کورد ب درێژاهیا سالێن مێژوویا نوى ڤێ ڕۆژى گاریگەریەکا ئەرینیا زۆر مەزن هەبوو، یێن ل سەردەمێ بەرى سەرهلدانا سالا 1991 نەورۆز دیتین ئەو دزانن کا ب چ ئاوایى بەرى زێدەتر ژ سیهـ سالان دهاتە گێڕان، و چ ڕامانێن کویر د ڤێ هەلکەفتێدا کۆم دبوون، چەوا دل و هەستکەر و جان و جەستە تێگەڕیان ل گەل هەلکرنا ئاگرێ نەورۆزێ دکرن. تا دەهکا داویێ ژ چەرخێ بیستێ ل نەورۆزان هەست وهوشیاریا نەتەوەیى ل جەم کوردان زیندى و گەرم و بلند دبوو، پرسیارێن هەبۆنى (وجۆدى) وەکى : ما ئەم ژى مینا هەمى گەل و مللەتان نە مرۆڤین؟!، چما نەتەوەیێن جیهانێ دەولەتێن خوەنە لێ مە کوردان پارچە قەوارەیەک ژى نینە؟ ئەرێ گەلۆ ئەگەر ژ مەیە یان ژى ژ دەرڤەى مەیە؟ دیسان پرسیارا هەرە مەزن: ئایا سەر ژنوى ئەم دکارن رۆژەکا نوى ژ بنێ ئەسمانى دەربینن؟!، ڤان پرسیاران ب هێز ل گەل هەلکرنا ئاگرێ نەورۆزێ خوە ل سەرێ هەر کوردەکێ ددا.

وى دەمى دژى ستەم و داگیرکرن و شوفینزم و دکتاتۆریێ ب واتەیا بەرگریێ نەورۆز دهاتە پێش و بەرجەستە دبوو. وى زەمانى د نەورۆزێدا باوەریا کوردان یا خۆیەتى ب سەرکەفتنا حەتمى ل سەر نەحقى و زۆریێ خۆرت و ب هێز دبوو، ل بەر چرایێ خوە نەورۆزێ کورد خرڤە دکرن.

ئەگەر تشتەک مەعنەوى وەکى نەورۆزێ ئەو ڕامانێن مەزنێن مە گۆتین و هندەک دیتر ژى هەبوون مە نە گۆتن هەمی د خوەدا هەمبێز کربن، چ کێشە هەیە ژ جیهانا میسلۆژیا هاتبت، بەرۆڤاژ بنیاتێ کەڤنارێ کەڤنار یێ میسۆلۆژیایێ جوانیەکا دیتر ددت ڤی تشتێ مەعنەوى؛ ڕاکێشەری و سحرا میسۆلۆژیا “کاوەیێ ئاسنگەر” و “ئەژدەهاکێ پشت ب مار” زێدەتر لێ دکت.

بهایێ ئەفسانەیا نەورۆزێ بیرا مرۆڤى ل وێ بهادیتن و نرخمەزنيا هندەک ئەدیب و نڤێسەرێن جیهانى ژ بۆ کویراتیا ئەفسانە و میسۆلۆژیا دهینت، وەکى تۆڕەڤانێ فەرەنسیێ بناڤبانگ (فۆلتێر) ـى ئەوێ دانپێدان ب داخباریا خوە ب پەرتۆکا پڕ بەڵاڤ “ئەلف لەیلە و لەلیلە” کرى، (14) جاران ل سەرخوە و بهزرکرن خواندى، چونکى یا پڕى ئەڤسانەیێن رۆژهەلاتینە، دیسان قەنجە بەحسێ ڕۆمانڤێسێ مەزنێ بەڕازیلى (باوڵو كويلو) بهینین سەر زمان، کا چەوان پێهەکار و داخباریا خوە ب سێهرا رۆژهەلاتى د رۆمانا خوەیا بناڤبانگ (کیمیائی The Alchemist)ـدا خوەیاکریە.

لێ مخابن ئەگەر ژ وێ جیهانا ئەفسانەیا ئاشۆپی یا نەورۆزا ئیلهامبەخش ژ بۆ گەلێ کورد ل سەردەمێ بەرى سەرهەلدانێ ڤەگەرین و تەماشەى سەربۆرا سەرەدەریا ل گەل نەورۆزێ دهێتە کرن و کارتێکرنا وێ سەرەدەریێ پشتى سەرهلدانێ بکین، دێ باش دیاربت کا چەوان کاریگەریێ ژ گیان و ژیانێ بەرەڤ کالبوون و دیکۆریێڤە چوویە!! ئەو دیکۆریە ژى ئەوە: یا حوکمڕانێن هەرێما کوردستانێ ب سەرێ نەورۆزێ دهینن، هیچ هێماییا نەورۆزێ ژبۆ خۆڕاگرى و شۆڕەشا دژى ستەمێ نە هێلاتینە، چونکى یێ نەورۆزێ دگێرن ئەو ب خوە مەزنترین جۆرێ نەدادیا جڤاکیا خۆماڵى دکن، ئەو ژى ب ئاوایەکێ تایبەت نەکێمتر ژ هر کوڵونیالیستەکێ رۆژهەلات یان ژى ئمپریالیستەکێ رۆژئاڤاى ئەڤە 31 سالە جۆرەکێ داگیرکرنێ یێ ترسناک دکن.

دۆژمنێن گەلێ کورد بەرى سەرهەلدانێ دکارێن بەهرەکا مەزن ژ سامانێن ماددیێن کوردستانێ ببن، لێ یێن مەعنەوى وەکى شانازی ب خوەبرن و مێژوویێ و هزرکرنا دەستەجەمعى و هەستێن هەبۆنێ و هێمایێن بەرخوەدانا نەتەوەیێ وەکى نەورۆزێ هەر دمانە پاراستى و ب ڕەونەق، بەلێ گەندەلى و ستەما خویانى یا حزبى و مالباتپەرێسى وەکى داگیرکەران و پتر ژى یێن ماددى دادعویرن و یێن مەعنەوى ژى ل سەر هێلما قەیرانێن ئابۆرى، سیاسى و یێن دیتر دشەوتینن، کەلتۆرێ ناسنامەیا مەژى ژ ناڤ دبن.

سەبارەت مە کوردان کا دلێ نەورۆز گێڕانێ ئەگەر بۆ رزگاریخوازیا ژ زولمى نەبت؟!

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close