رۆژه‌ڤكوردستانی

دەرگەھێ کریارا سیاسی یێ (166) رۆژە گرتی و ل شەمبیێ ژی ڤەنابت!


جاسم محمد شرنەخى

ژ سەیر و سەمەرێن دونیایێ پڕۆسیسا سیاسیە ل عیراقێ، نەخاسمە ل ڤێ گەرێ! هەر دەرگەهێ مەزن ژى ب (هەلبژارتنا سەرۆک کومارى) ڤەنەبوویە، ئانکۆ پێنگاڤا ئێکەما (بڤێ نەڤێ) بەرەڤ کریارا سیاسی نە چێبوویە. ل خۆلێن بوورین ئەو دەرگەهە ب ئاسانى دهاتە ڤەکرن، ژبەرکو وەکى ئاشکەرا ل سەر بناغەیەکێ پێگیرى ب سازانەکا سێ گۆشەیا (مى دبەڕا نەچت) یا (عیراقى – کوردستانى) و (کوردستانى- کوردستانى) و (پارتى – یەکێتى) دھاتەکرن،

لێ پشتى ڤەبوونا دەرگەهێ سەرۆک کۆماری ئەو پێڤاژۆیا دویڤرا زۆر گێرۆ دبوو، گەلەک بێ تام ژى دبوو، قەیران د کەڤتن سەر قەیرانان، بەلێ دڤێ خۆلێدا هەر ل دەستپێکا دەستپێکێ ما شاء الله عیراقێ پێشکەڤتنەکا بەرچاڤ ب خوەڤە دیت، لێ هەلبەت نەک بەرەڤ باشتریێ، بەرەڤ خرابتریێ، چەوا نە و ئەڤە (166) ڕۆژ د سەر هەلبژارتنێن خۆڵا پێنجێدا یێن ل 10-10-2021 دەربازبوون، ئانکو هەیڤا شەشێ ژى ب نێڤى بوو و هێشتا هەمى سیاسى یێن ل پشت دەرگەهێ مرادان، یێن ل دەرازینکێ قەفاین نکارن ب چنە دناڤا کریارا سیاسیدا.

بڕاستی ئەڤە داهێنانەکا عیراقى و کوردیە و چ وەڵات نکارن پێشبڕکیێ یانژى هەڤڕکیێ ل گەل بکن، لوبنان تێ نەبت! دویر نینە ڤێ خۆلێ ئەو ژى ژ مەیدانا بەریکانێ دەرکەڤت، عیراق نمرەیا ڕیکۆردى (قیاسى) یا بێ ڕکابەر بۆ چەندین سال و زەمانان بنچاڤ و مسۆگەر بکت، یا دیارە وەکى دبێژن: (کوریا کەرى) ڕاوەستایە و شاندێن لایەنێن سیاسى نە راوەستاینە، نەخاسمە یێن کوردى چونکى ئەلبەت تەپە یا د گۆڕەپانا لایەنێن سیاسیێن کوردیدا، تایبەت پارتى و یەکیتی و تایبەتر پارتی، بەلێ پرسیار ئەوە: ئەرێ دێ شێن وێ تەپێ بەرەڤ ئارمانجا هەمى ل هیڤیێ ببەن، ئانکۆ شەمبیێ 26-3-2022 بکنە شەمبیا مەزن، ئەجیندەیا پەرلەمانى ب هەلبژارتنا سەرۆکێ کومارا عیراقێ بجهبهێت، ئەگەر ئەڤا بوورى پرسیارەک بت، ئەز بخوە دبینم بەرسڤ: نەرێیە، پێشبینی ناکم تەپە ژ نیڤا گۆڕەپانێ ببوورت.

باشە، پا ئەڤ ڤەلڤینێن سیاسی و چوون و ھاتنا شاندا هەر ژ دەستپێکێ و هەتا نها چ خێر ژێ چێنابت؟!، نەخێر ژبەرکو هەمى د بازنەیەکێ ڤالایێ گرتیدا دزڤڕن، نە پارتى ژ (هێسترا بەلایێ) دهێتە خوارێ و نەرماتیێ پێشچاڤ دکت، نە یەکێتی خوە مەجبۆر دبینت قوربانیا هەرە مەزنا پیڤەلەرز بدت، دەست ژ پێشبرکیا پارتى بەردت، دەرگەهێ بەلایێن مەزن ل ناڤخۆیا حزبا خوە ڤەکت، هەمى چاڤدێرێن سیاسی کاریگەریا مەزنا ڤى پۆستى بۆ یەکیتى نیشتیمانى کوردستان و سەرکێشیا وێ دزانن، سەرۆک کۆمار نەک تەنها پۆستەکێ گرنگە، بەلکى بەرژوەندیەکا ستراتیژیا نمرە ئێکە ل نها.

ئەڤرۆ ھەڤسارێن ھەمی پێگەھێن مەزن یێن: (سیاسی، ئابۆری، ئەمنی، دبلۆماسی, ..ھتد) ل کوردستانێ د دەستێن پارتیدا نە، نەک یەکێتی، ژبلى ڤێ یەکێ ژی کاراکتەرێ هەرە مەزن دناڤا یاریگەهێدا کو ئیرانە ژ دەستدانا یەکێتیێ ژ ڤی پۆستی و دەستدانا لایەنێن عەرەبی یێن ئیران وان پتر ب نوێنەرێن بەرژەوندیێن خوەیێن ستراتیژی دبینت، ژ هەمى پێگەھێن دیتر یێن هەستیار و سەردارى (سیادى) دناڤا حکۆمەتا عیراقێدا ئەبەد قەبوول ناکت، ئیرانێ ب شەڤ و ب ڕۆژ، ب ڤەشارتى و ب ئاشکەرایى، ب نەرماتى و ب زڤرى، ب بازارگەرمى و ب ترساندن (تەرغیب و تەرهیب)، ب گەڤ و بجهئانینا گەڤان، پەیامێ ل دویڤ پەیامێ ژبۆ هەمى لایەنان – نەمازە بۆ پارتى – ڤڕێدکت، لێ ئەڤا دویماهیێ گرنگیێ پێ نادت.

ڤێجا چ بکین ئەڤرۆ نە بۆ ئەمریکا پڕۆسیسا سیاسى ل عیراقێ و یاریا هەڤڕکیا لایەنێن کوردی جهێ گرنگیدانا ئستراتیژیە، چونکى وێ قیبلگەھا ستراتیژیا خوە گوهارتیە، بەرێ خوە دایە هندەک دۆسەیێن ژ عیراقێ و کوردان گەلەگ فەرتر، ئەو باش مەترسیا بەرەڤ پێشڤەچوونا تەنینێ سورێ چینێ وەک دێوێ مەزنێ ئابۆرى، دیسان هرچێ سپیێ ڕۆسی ژى دبینت، دیسان ئەڤرۆ نە کەسایەتیەکا وەکی مام جەلالێ مەزن د ژیانێدا دایە ل جەمسەرێ ھێزا مەزنە، ب نەرماتیا خوە و ب گیانێ مرۆنەیا سیاسى دەستبەرداریێ بکت، گلیکێ پاڤێژت دەرگەهێ مەزن.

دەمێ من ئەڤ ڕێزە ڕەش دکرن هەوالەکێ گرنگێ چاڤەڕێکرى ژ تەڤگەڕا ئیمتداد یا عراقى هات، د لێدوانەکێدا سەرۆکێ بزاڤا ناڤهاتى (علاء الرکابي) خوەیاکر: كو ئەو و ئەندامێن سەربەخۆ (وەکى وى گۆتى 50 ئەندامن) بەشدارى ڕوینشتنا رۆژا شەمبیێ 26-3-2022 نابن، دیسان ئەندامێ چارچۆبەیا ھەماھەنگی – الإطار التنسیقی (محمد الزیادی) ڕاگەھاند: “نەخەشەیێ دەنگێن ‎سێکا ڕێگر (الثلث المعطل) بو ڕوینشتنا ٢٦-٣-٢٠٢٢ ب ڤی ڕەنگییە: (83 ھەماھەنگی)، (19 یەکێتی)، (17 ژ مالا سوننی)، ژبلی ئەندامێن سەربەخۆ ژی ھەمی دێ بایکۆتا جڤینێ کن”واتە: (ڕێژەیا – نیصابێ) یاساییێ – دوو ل سەر سێ ژ ئەندامان ل پەرلەمانێ خوەدى(329) کورسیان – تەمام نابت، واتە هەرێ وەکى بەرێ جڤینا پەرلەمانى ناهێتە گرێدان، دەرگەهـێ مەزن ل بەرامبەر کریارا سیاسی دێ گرتی مینتن!

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close