جاسم محمد شرنەخى
د ماوێ چار رۆژاندا چەندین نمۆنەیێن گاریگەریا سیاسیا تۆڕێن جڤاکی ل سەر ئاستێ دەولەتا عیراقێ و ناڤەندێن سیاسێن کوردستانێ بەرچاڤ بوون، لێ یا گرنگە باس ل دوو میناکێن کارڤەدانێن مەزن ب دویڤ خوە را ئانین بکین: –
نمۆنەیا ئێکێ/ تویتا کەسایەتیەکێ پارتى بوو، هەم ژلایێ ئەکادیمیڤە یێ بەرز و بەرنایاسە (پرۆفیسۆرێ هاریکارە)، هەم ژلایێ چالاکیێن میدیایى ل پەیڤگەهێن تۆرێن کومەڵایەتى یێ دیارە – نەخاسمە – ل سەر پەیڤگەھا تویتەرى کو هێشتا ب کارئینانا وێ پتر بژارەییە (نوخبەییە)، ژلایێ پێگەهێ حزبیڤە ژى دبینم ئەستەمە دشیاندا بت کو حاشاتى ل ئەندامەتیا بەڕێزى ناڤبرى بهێتە کرن، بەلکێ زۆر زۆر ب زەحمەتە ئاستێ ویێ کادرێ نزم بھێتە دیارکرن ، چونکى دهەلبژارتێن پەرلەمانێ عیراقێ یێن خۆڵا بۆریدا «2018» ئەو بەربژێرێ وێ حزبێ بوو ، گەرەگە هێشتا بەرمایکێن چەند وێنەیەکێن وى ب هندەک دیوار و ستوینێن بلندڤە مابت، ژ ھومیان ڕا یا خوەیایە: یێ بهێت کاندیدکرن دڤێت ئەو د چەندین فلتەرێن حزبی ڕا دەرباز ببت هەتا (OK)یا ڕازەمەندیێ ژێ ڕا بهێتە دان.
تویتا ڤى کەسى باندۆرەکا زۆر مەزن هەبوو، بۆیەرێن نەخوازیار وان سێ چار پەیڤەکێن دژى مەرجعێ شیعەمەزهەبان (سيستانى) ل دویڤ خوەڕا کێشان، و دئەنجامدا نێزیکبوو ببتن ئەگەرێ سەرهلدانا شەڕ و بەلایەکا تائيفەگەرى و ئاگرێ وێ تەر و هشکان بشەویتن، ژ بلى وان کریارێن ئاژاوەگەریێن مەزنبوووین و هەتا بارەگایێ ئێک ژستوینێن مەزنێن پرۆسیسا سیاسى ل عیراقێ و کوردستانێ ب شەویتنت.
دکاڤەدانێت سوشیال میدیایی ب پۆست و کومینتان و ب کارئینانا وێنە و گرافیک و ڤیدیۆگرافیکان وانەیەکا مەزن هاتە بەرچاڤکرن ئەو ژ ی ئەڤە یە: دڤێت نەک دوو جارى بەلکى چەندین جاران بەریا نڤێسینا هەر پۆستەکێ – نەخاسمە ئەگەر سیاسى بت – خودان هزرێن خوە بکت، هەستا بەرپرسیێ زۆر گرنگە، دڤێت هەمى گۆشە ل پێشچاڤێن مرۆڤى بن، دیسان زۆر فەرە نڤێسەرێ پۆستى ل پاش خوەژى بنەڕت، پرسیارێ ژ خوە بکت: ئەرێ گەلۆ بەڵاڤۆکا من دێ چ دەرئەنجام هەبن؟، هەمى ئاست و بیاڤ: (نیشتمانى، نەتەوەیى، حزبى..هتد) داویێ گرنگە ئەڤە خر جهێ پویتەپێدان و چاڤدانێ بن.
– نمۆنەیا دویێ: کارڤەدانێت تۆند بوون، یێن چالاکڤانێن سۆشیال میدیایێ هەمبەر بەشداریا تەڤگەڕا (نەوەى نوى)یێ د جڤینا پەرلەمانێ عیراقێدا ل 26-3-2022، فەیسبۆک و ئەنستگرام و تویتەر و هەمى پەیڤگەهێن تۆڕێن گۆمەڵاتى زۆر شارهان، بوونە ئاگر و پێت ب سەرسەرێ سەرکێشیا ڤى لایەنى و سەرۆکێ وێ بەڕێز (شاسوار عەبدولواحد)ـیدا هاتنە خوار، تا وى ڕاددەى مفا و کارتێکرنەکا باش ژ وێ خوەبەرهەڤیا مەزنا پێشوەخت یا تەڤگەڕا ناڤهاتى نەبوو، کو هەڤدە خال وەکۆ مەرج ژ بۆ ئامادەبوونا وان د جڤینێدا هاتبوون دانان، دیسان ڕویبڕویبوونا هێرشێن فەیسبۆکچى و هەڤالێن وان ل تۆرێن دیترێن کۆمەڵایەتى ژ لایێ چالاکڤانێن نەوەى نوى و سەرۆکێ وێ کاریگەریەکا كێم ژى د سڤکرنا دەربێن ئەلکترۆنیێن هاتینە وەشاندن نەبوو، زمانێ جەستەیێ سەرکردەیێن تەڤگەڕێ یێن گۆتار پێشکێش دکرن ب ڕۆهنى دگۆتنە هەمى دونیایێ: زۆر زەحمەتە ئەگەر نەبێژن مەحالە ژى قيمپێئانین (قەناعەت) ل دەڤ وان ب خوە بەرى ل جەم هندەکێن دیتر پەیدا ببت، ئەڤجا چەوان دێ قەناعەت بۆ جەماوری چێ بت؟!.
ژبەر وێ یەکا بۆرى ل داویا هەوێن بەردەوام یێن بەڕەڤانیێ ژ هەلویستێ (پشکداریا د جڤینا 26-3 دا)، هەلویستەکێ دیترێ پێچەڤان و دژبەر ژلایێ ڤێ تەڤگەڕا ئەم بەحس ژێ دکین هاتە دان، ئەوبۆ ل ئێڤارا ڕۆژا سێ شەمبێ 29-3-2022 ژ بلندیترین ئاستێ وێ بڕیار ب باکۆتا ڕویشنشتنا رۆژا 30-3-2022 ھاتە دەرخستن، پاشێ داوەتیێن جەمسەرێ سێکا ژکارخستکەر (الثلث المعطل) بانگ ل (نەوەى نوى)ـێ کر ھەر وەگی گوتین وێ: وەرە خالەتا مێمێ تو ژ گۆڤەندێ کێمێ، ئەوێ ژى ژ مەجبۆریا خوە ل بەر زرنایا سوشیال میدیایێ ل دیلانا بایکۆتچیان مل هەژاندن.
ل ڤێرێ پەندەکا مەزن ژبۆ هەمى سیاسەتمەداران هاتە پێشکێشکرن پۆختەیێ وێ ئەوە: (زەمان زەمانێ سۆشیالمیدیاچیانە، یێ هزرێ بۆ وان و ئامۆر و چەکێ وان نەکت، ھەلبەت ئەو ل دەرڤەى مێژوو و جوگرافیێ دژیتن، ئەو نەیێ ڤێ جیهانێیە). یێ ژ سیاسەتمەداران شارەزا و ژیر ئەو ئاليە: یێ ب شێوازەکێ زانستى و ئاقلانەیى ئەڤێ پرا گرنگا ئەلتەرناتیف تونە بۆ پەیوەندیکرن و هەڤپەیوەندیکرنا سیاسى ب ئاوایەکێ کاریگەر پەیڕەو بکت.
