رۆژه‌ڤكوردستانی

ڤەکشیانا ڕەوتێ سەدری ژ پێکئینانا حوکمەتا زۆرینە یا چاڤەرێکری بوو

Kan vara en bild av 1 person

محەمەد چەلکی

سەدر و تەڤایا باسکێ ئیسلاما سیاسی نەجهێ چ باوەرێنە کو رێکخستنێن سیاسی هەڤپەیمانیان یان بەرەیان ل گەل پێکبینن، ئەگەرێن ڤێ چەندێ دزۆرن لێ یێن هەری بالکێش کو دبنە سەدەم و رێگر باوەریێ بکارێن بەرەی و پێگیری نەکرن ب رێککەفتنان ڤەدگەریت بۆ وێ چەندێ کو ئەو هەلگرێن پەیامەکا خودایی یا ڕاستن و لایەنێن دن تەڤ دژی پەیاما خودێنە و ب پارتێن رێبازا تاغۆتی دهەژمێرێن.

هەر رێککەفتتنەکا بکەن د دەمکینە و ئەگەر دخزمەتا ئەجندا وان دا نەبیت، ب ساناهی ڤەدکشن و هەر وەکو چ رێککەفتن، نەکرین. ڤەکشیانا رەوتێ سەدر ژ وێ رێککرفتنا د گەل پارتی، حەلبوسی و خەمیس خەنجەری بۆ پێکئینانا حوکمەتا زۆرینە بێی ئاگەهدارکرنا پارتی، حەلبۆسی و خەمیس خەنجەری نموونا هەری نێزیکە. پرسیارا هەرە گرنگا ئەڤرۆ هاتیە د شکەڤا حزبێن کوردستانی دا ب تایبەت پارتی-ئێکەتی چونکو ئەڤ هەردوو حزبە خوەدی سەربۆڕەکا بەرەیی و پێکڤە کارکرنا سیاسینە ل سەر ئاستێ هەموو عێراقێ، پرسیار ئەڤەیە:

ئەرێ دەم نەهاتیە بۆ هەلبژارتنا رێککەفتنان دگەل لایەنێن عێراقی ل پێشیێ ل ئایدولۆژی و دیدا وان یا سیاسی بۆ تەڤایا ئاریشێن عیراقێ و کێشا کوردی ب تایبەتی و پرسا دیمۆکراتی و مافێن مرۆڤی، بهێتە ڤەخاندن و ل گۆڕەی وێ دیدێ رێککەفتنان بکەن؟

رێککەفتنا پارتی دگەل ڕەوتێ سەدر بێی ڤەخاندنا کەسایەتیا سەدری و ڕەوتێ وی هاتیە کرن، هەروەسا رێککەفتنا ئێکەتیێ دگەل چارچۆڤێ هەڤکاریا شیعی ب هەمان هزر و دیدا پارتی رێککەفتن کرییە.

ئەڤ رێککەفتنە نە ژ بۆ بەرژەوەندیێن بلندێن هەرێما کوردستانێ هاتینە کرن بەلکو بۆ قڕاندنا هەژموونا هەڤ هاتینە کرن، هندی ئەڤ زهنییەتا باسک قڕاندنا هەڤ ئەجندا حزبێن کوردستانی بن، چارەنڤسیسێ هەموو رێککەفتنێن تەک لایانە دێ ب دەردێ رێککەفتنا پارتی دگەل ڕەوتێ سەدر چیت!!

چ ڕەوتێ سەدر و چ چارچۆڤێ هەڤکاریا شیعی نە خوەددی دیدەکا ستراتیجی و دیمۆکراتینە بەلکو پاشکۆیێن ئیرانێ و ئەجندا ئیرانێنە و ل گۆڕەی بەرژەوەندا ئیرانێ تەڤگەرێ دکەن ئانکو د تائیفینە و پارستنا پێگەهێ شیعەیان و پاراستنا ڤی پێگەهێ پشتی ٩-٠٤-٢٠٠٣ ب دەستکەفتی ئەجندا تەڤ باسکێ ئیسلاما شیعییە.ل ڤێرە دیار دبت کانێ بۆچی هەموو رێککەفتنێن لایەنێن کوردی د گەل حزبێن ئیسلاما شیعی نەگەهەشتنە ئەنجامێن باش کو د بەرژەوەندا کوردان دا بیت. ئیران ب هەموو هەژموونا خوە بزاڤێ دکەتن کو هەرێما کوردستانێ ژ قۆنا‌غا نەمرم نەژی دەرباز نەبت و هەردەم وەک پاشکۆیا حزبێن شیعی دیار ببیت و هەردەما ژ وی چارچۆڤەی دەرباز بوو، ئیران بزاڤێ دکەتن جارەکا دی هەرێما کوردستانێ بزڤرینتە (بیت الطاعة) بن چادرا مالا شیعەیان، قۆناغا پشتی ریفراندۆما کوردستانێ(٢٥-٠٩-٢٠١٧) باشترین گرۆڤەیە.

ل بەر چاڤنەگرتنا ڤان خالێن سلال باس ژێ هاتیە کرن ژ لایێ پارتی-ئێکەتییڤە هەرێما کوردستانێ هێلایە د کۆربەقا قەیرانان دا و ئاسۆیا دەرباز بوونێ ژ ڤێ کۆربەقێ دیار نینە و گەهەشتیە ڕادێ خەلکێ کوردستانێ ئێدی باوەری ب گۆتارا نیشتیمانی و نەتەویا ڤان هەردوو حزبێن کوردستانی نەمینیت.

ئەڤە مەزنترین مەترسییە ل سەر هەرێما کوردستانێ، هەر ئەڤ خالەیە ژی بوویە بێهزبوونا هەردوو حزبان و نەئێکگۆتریا کوردان چ ل سەر ئاستێ کوردستانێ و چ ل سەر ئاستێ عێراقێ. ئیران، باسکێ شیعە و تورکیا ئەڤێ نە ئێکرێزیا کوردان و شکەستنا برێڤەبرنا هەرێما کوردستانێ و نەرازیبوونا خەلکێ کوردستانێ وەکە کارتەکا فشارێ ل دژی حوکمەتا هەرێمێ و هەردوو حزبان(پارتی-ئێکەتی) بکار دئینین.

هەلبەت بەرهەمێ ڤێ فشارێ دیارە و سەرکرداتیا هەردوو حزبان شەپلاندینە، شیانێن ڤەخاندنا رەوشا سیاسی نەماینە ب دروستی کەفتنە بن باندۆرا ئەجندایێن باسکێ شیعە-ئیران و باسکێ سوونە-تورکیا، ئەڤ پاشکۆتیا سیاسی ژ بلی زیانێ و درێژکرنا ژیێ قەیرانان تشتەکێ دن ناهێتە شکەڤا کوردان. دەستداهێلانا ڕەوتێ سەدر بۆ چارچۆڤێ هەڤکاریا شیعی بەرهەمێ فشارا ئیرانێیە د هەمان دەم دا گەفە بۆ پارتی کو ژ دەرڤەی سنوورێ دیارکریێ ئیرانێ نابیت چ لڤین بهێنەکرن ب تایبەت پشتی سەرۆکوەزیرێ کوردستانێ رێزدار مەسرور بارزانی د کۆربەندا جیهانی بۆ ووزێ ل ئیماراتێ گۆتی(٢٨-٠٣-٢٠٢٢):”

ئیران رێگریێ ل مە دکەت دا نەبینە ناڤەندەک ژ ناڤەندێن دابینکرنا ووزێ و هەروەسا دخازت ئەم دەستبەرداری وان گرێبەستان ببین یێن مە هەتا نوکە کرین.” دەستداهێلانا ڕەوتێ سەدر یا چاڤەرێکری بوو و هندی سیاسەتا تائیفی ئەجندا تەڤ حزبێن باسکێ شیعە و سوونەیان بیت، هەژموونا ئیرانێ دێ یا نەلڤ بیت و عێراق ناگەهیتە چ کەنارێن ئارام و پرسا کوردی دێ بڤی رەنگی بیت و قەت باشتر نابیت.

بلا کەیفا ئێکەتی و هەڤ ڕکێن پارتی ب ڤێ چەندێ نەهێت کو ڕەوتێ سەدر دەستداهێلان و پارتی دەستڤالا ژ وێ رێککەفتنا کری زڤری چونکو ئیران ب هەموو کارتان دلەیزیت و تەنێ بەرژەوەندا ئیرانێ چ بخازت، حوکمەتا ئیرانێ وێ دکەتن، ئەڤرۆ ل دژی ڕەوتێ سەدرە سوبەهی دگەل ڕەوتێ سەدرە. کورت و کرمانج ل سەر پارتی-ئێکەتی و تەڤ لایەنێن دن یێن سیاسی ل کوردستانێ فەرە ب ئێک ئەجندا کار بکەن و دەستان ژ باسک قڕاندنا هەڤ بەردەن و سیاستا لەیزتن ل سەر گەلەک بەندان، ژ بلی زیانێ بۆ گشت کێشا کوردی ل عێراقێ تشتەک دن ناهێتە شکەڤا چ لایەنان. هەردیسا فەرە پارتی-ئێکەتی پتر خوە نێزیکی لایەنێن دیمۆکراتخاز، لیبەرال و نەتائیفی بکەن چونکو تەنێ ئەڤ لایەنە دکارن کێشا کوردی ل عێراقێ چارەسەر بکەن.

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close