جاسم محمد شرنەخى
وەکو سنۆربۆراندن و دەستدرێژیکرن ژلایێ هێزێن دەولەتا تورکیاڤە، دژى گەریلایێن پارتیا کارکەرێن کوردستانێ و تەعدا ل سەر خاکا هەرێمێ و سەروەریا دەولەتا عیراقێ ژى نەیا نویە، هەر مە ڤى گەلى ئەڤە ب چاڤێ خوە دیتیە و ئاخا مە ب ئاگرێ وان و هندەکێن دن یێن مینا وان شەوتیە، لێ ئۆپەڕاسیۆنا ڤێ جارێ ژ لایێ تورکیاڤە هاتیە ڕاگەهاندن، پاشان د کەتواریدا ب دۆزەخى هاتیە ئەنجامدان چەندین جوداهیێن مەزن هەنە.
جوداهیا یەکێ:
ژ لایێ بەرفرەهیا ئۆپەراسیۆنا لەشکەریە، بیاڤێ دناڤداهاتنا لەشکەرى ل وان جهان یێن بەریا زێدەتر ژ سالەکێ، کو بەهرەکا هەر زۆر جهێن گرنگ و ستراتیژى ل کۆخێن بلند و کوپیتکێن چیایێن دەڤەرا سندى و بەروارى و گولیا و دەڤەرێن دیتر ل سنۆرێ پارێزگەها دهۆکێ نەڕاوەستایە، ئەو جهێن ناڤهاتین د بێ دەنگیەکا سەهم ژلایێ حکۆمەتا هەرێمێ وعیراقێڤە، تورکیا بنگەهێن خوەیێن لەشکەرێ ل چل خالێن گرنگ ئەڤە سالەکە بنەجهکرینە، بارەگایێن مەزن د باشۆرێ کوردستانێدا دەیناینە، هەر وەکى پارچەیەک ژ ئەنادۆلێ، و هەر وەکى هەمى خوەدیێن ڤى وارى بیانى و بێ ماف و هەژى کەڤ و هەڕەشێن سەربازى، ئۆپەراسیۆنا ڤێ جارێ ژ بۆ بەرفرەهکرنا مەودایێ داگیرکرنێ تا ئەو جهێن مایین ژى ل مەتینى و دەڤەرا دۆسکیا. ئانکو بکورتى هندى بلنداهیا چیایەکێ ل دەڤەرا بەهدینان چاڤەڕێیە بکەفت ل ژێڕ کونترۆلا تورکیاڤە، تۆرک ژۆردا ل هنداڤى خەلکێ ڤێ دەڤەرێ بن، باوەرکن یا تۆرکیا ڤی جارێ کرى – و هێشتا ڵێلێ یە ژى و لۆلۆ یا ماى – ل بەرە گەلەکا دیتر بکت، چ جاران حکۆمەتێن عیراقێ یێن کەڤن و نوى ژى ب ڤى ئاوایى نەکرینە، ڕاستە ل ئەنفالێ دەڤەر هەمى هاتە گرتن، بەلێ رژێما دکتاتۆریا بەعس ل هەر کۆخەکێ چیاى بارەگایەکێ لەشکەرى – مینا تورکان – چێنەکر.
جوداهیەک دویێ:
ئەوە فرەکارئینانا چەکى، وەکى ئەم دزانن ستراتیژیا تۆرکیا ل ڤان دوو سالێن بوریدا ب کارئینانا فرۆکەیێن بێ ڤرۆکڤان درۆنان بوو، ئەوێن ژ لایێ پیشەسازیا تۆرکیڤە هاتینە درۆست کرن و بناڤێ بەیرەقدار هاتینە ناڤکرن، لێ ڤێ جارێ هەمى جۆرێن چەکێ گران – مۆشەکێن بالستى تێنەبن – یێت هێنە بکارئانین: فرۆکەیێن شەرى، کۆپتەر، بکارئینانا تۆبخانەیا گران، ژ بلى ئانینخوارا سەربازان (ئینزال جەوى)، ئەڤە هەمى ژى ب ئاشکەرایى ژ لایێ وەزیرێ بەڕەڤانیا تۆرهکیا (خەلوصى ئاکار)ـڤە هاتیە ڕاگەهاندن، هەمى ژى ل پێش چاڤێن هەمى جیهانێ دهێتەکرن، هەر وەکى عیراق ئەردەکێ بەردایێ بێ خودان، دەولەتێن زلهێز و ئەو خەلکێ سەرکێشیا جیهانێ دکەن گۆتینە تۆرکان: هەرن دەستێ هەوە ژ هەوەرا، هەر ئارمانجەکا هوین بجهبینن عافیەت ئۆلسۆن پاشا!
جوداهیا سیێ:
ئەڤ ئۆپەراسیۆنە یا هەڤدەمبوو ل گەل چەندین دیدار و کۆمبوونێن سەرۆکێ حکۆمەتا هەرێما کۆردستانێ ل گەل سەرۆکێ کۆمارا تورکى ل ئستانبۆلێ (نە ل پایتەخى)، و ل گەل مەزنە بەرپرسێن حکۆمى ئەنجامداى، ئەو سەرەدان و دیدارێن هەمى پرۆتۆکۆلێن دبلۆماسى تێدا هاتینە شکاندن، کارڤەدانەکا تۆند ل ناڤەندێن سیاسیێن هەرێمێ ب دویڤ خوەڤە ئانین، تشتەکێ گەلەک سەیر ئەڤەیە: ڕاگەهاندنا زۆنا زەرا سەر ب پارتیڤە یا ڕژدە کو دەرئەنجام دێ بەرژەوەندیا خەلکێ هەرێمێ و ژیارا واندا بت، بەلێ گەلەک!!، بەهرەکا زۆرا سیاسەتمەداران ب سەرەدانەکا نەرێنى و ژێربەژێڕ و حزبى سالۆخەتدایە، ئەڤ لەشکەرکێشیا تۆرکیا ژى ژ ئەنجامى هەڤکارى و هەماهەنگەیا پارتى و تورکیا هاتیە ل قەلەمدان، مینا وێ بیرۆکێ ژ لایێ تورکیاڤە ژى هاتیە خوەیاکرن، لێ ئەڤ چەندە ژ لایێ حکۆمەتا هەرێمێڤە نەهاتیە ڕەتکرن یان تەکەزکرن.
جوداهیا چارێ:
ئەڤ ئۆپەراسیۆنە ل دەمەکێ هۆسان دهێتەکرن چ زەمانان وەکى نها ناڤمالا کوردى ژبەرئێکچووى نەبوویە، ل گەل وێ دۆجەمسەریا تۆند دناڤبەرا پارتى و یەنەکێدایە، هەر ئێکێ ژ وان هەردۆیان ب جەمسەرەکێ ناڤخویی عیراقى و هەرێمدارى و جیهانیڤە گرێدایە، ئەڤە هەمى بوویە ئەگەرێ ڤالاهیەکا سیاسى، ڕەوشا عیراقێ بەرەڤ زتمبۆن و قەپاتبۆنەکا سیاسیا ترسناکڤە دمەشینت، دبت ئەڤ چەندە بخوەژى وەک دەرفەت ژلایێ تورکانڤە هاتبیتە دیتن تا ئۆپەڕاسیۆنەکا ب ڤى ڕەنگى ئەنجام بدن، ل گەل دەلیڤەدیتنا ڕەوشا سیاسیا هەرێمدارى یا ب هەلویستێ ئیرانێڤە گرێداى، ژبلى یا نێڤەدەولەتى ئەوا پەیوەندى ب شەرێ رۆسیا و ئوکرانیاڤە ژى هەى، وە دیارە جیهان مژویلى ئیدارەیا ململانەیەکا مەزنە، یا ژێ چاڤەڕێ بۆیەرێن دونیاهەژینڤە ل داویێ بهێن، ئەو ڕەوشا نێڤدەولەتى زۆر ژ هەرێمێ و چیایێن بەهدینان مەزنترە، ل دەڤ مەزنێن جیهانێ ژ کوردستانێ هەمیێ گرنگترە.
جوداهیا پێنجى:
د مێژوویا نوى و سەردەمدا، پشتى شەرێ جیهانیێ دویێ و هەتا ئەڤرۆ چ جاران وەکى ڤی دەمێ ئێمناهیا خۆڕاکى ئەوا ژ هەمى ئێمناهیان بنگەهیتر نەکەفتیە ل ژێر کەڤاندا، سەڕەراى ڤى سامانێ پترۆلیێ زەبەلاح یێ دهێتە هەدرکرن و داهاتێ وى ب شەڤ و ب ڕۆژ ل بەرچاڤێن خەلکێ د هێتە چەپکرن و خوارن، گەلێ هەرێمێ کەفتیە ل ژێر ئاگرێ ستەما سیاسی و دوو چینیدا، چینا گەندەڵکارێن ستەمکار و چینا هەژارێن ستەمدیتى، واتە ئاشتەواییا جڤاکى ژى یا ل سەر دەستێ دێوەکێ، هەما تە هند دیت ژناڤچوو، ئەڤە هەمى نەبەسە ئێمناهیا قەوارەى ژى کەفتە بەر شلقاڤێن ئۆپەڕاسیۆنا تۆرکى. ل گەل ڤان بۆیەرێن ل سەر گەلێ باشۆر زۆر مەترسیدار، لێ هێشتا بۆقڤان نە ل منێ نە ل تەیێ، هەر ل سەر نەهـ و دەهێن خوەیێت بەرینە، هەردوو قاونێن کۆنێن گەڤنار یێت هێنە ڵێدان:
قاونا ئێکێ دبێژت خەلکێ: هوین نانەکێ بخۆن و ئێکێ ب خێرا سەرێ مەزنێن مە وەک خێر بدن، ژ بەر ڤێ خوەشیا ئێمناهى و ئازادیێ، وەى ما شا الله وەى ما شا الله بۆ ئێمناهى و ئازادیێ!!
قاونا دویێ ژى ڤێ حەیرانۆکێ دڤەلۆرینت: هەمى کێشە پارتیا کارکەرێن کوردستانێیە، چما ناچت باکورێ کوردستانێ خەباتا خوە ناکت، بۆچى بەلا خوە ژ مەڤە ناکت، هەر وەکى خەلکێ ب پەز دهەژمێرن، نابێژنە خوە ئەڤە ژ حەتمیەتا سایکس – بیکویە، لۆژیکا دوستێ دوژمنى دوژمنە دناڤا کورداندا چاندیە، هۆسان حزبا ئەو دپەڕێسن بەریا 40 سالان و پێدا وەرە ل کوردستانا رۆژهەلات جەندین جاران ژبۆ ڕژێما ئیرانی کۆردێن خەباتکەر ل سەر ئاخا وان کۆشتینە، هەر وەکى هزردکن:
خەلک دەرزیێ د چاڤێن خوەدا دبینن لێ گێسنى نە ئەو د چاڤێن خوەدا دبینن نە خەلک ژى دبینن!
