جاسم محمد شرنەخى
تشتێ د ڤێ حەفتیێدا ژبۆ بەهرەکا زۆر ژ خەلکێ دلخۆشکەر؛ دوو جۆرێن گۆتاران د دەریا تاریستانا مەلاقیێدا بوون: – یێ ئێکێ: ژ مامۆستایێ زانستێن سیاسى پرۆفیسۆر (صادق زیبا کەلام) خوەیا بوو. – یێ دووێ ژى ژلایێ چەند رۆژنامەڤانێت ژێهاتى – نەمازە مامۆستا محەمەد رەئۆفى- د گۆنگرەیەکێ تایبەتدا ل گەل سەرۆکێ حکۆمەتا کوردستانێ بەرچاڤ بوو.
بەریا بهێم تیشکەکا ڕۆناهیێ بێخم ل سەر ڤان هەردوو چراکێن رۆناهیێ، ئەز نەشێم ب ئاسانى خوە ژ وێ ئازارا خوەشرینکرنا دەهۆلقوتێن مالویران قورتال بکم، ئەڤ بزاڤا مەلاقیێ یا ل گەل دەردەسیا ڤى گەلى هەر بەردەوام، یا ناڤخویى بەس نینە، جاران یا عیراقى و عەرەبى ژى دبتە سەربارک.
بەریا ماوەیەکێ من – وەکو نڤێسەرەک – دڤیا تەماشەڤانیا چاڤپێکەفتنا تەلەفزیۆنى یا کەناڵێ (ئەلشەرقیە) ل گەل سەرۆکێ هەرێمى بکم، لێ موخابن من نەکارى تا داویێ وەختێ خوە ل گەلدا ببمە سەرى، ژبەر وى قەبارێ مەزنێ دوو ڕویاتى و مەلاقیا دهاتە بەرچاڤکرن، دەمێ سێ بێژەران هەڤبڕکى ل سەر سەنا و تەسبیحان ب پەسنا بەرێز سەرۆکێ هەرێمێ دکرن، هەر ل دەستپێکێ د بیاڤێ ئابۆریدا هۆ وەسا پڤکرنێ وەسا پڤکرنێ تا وى ڕاددەى یێ کوردستان نەدیتی دابێژت: ئەساهى ئەساهى تایوان و سەنگافوڕا ل پاش هەرێما مە نە، دەمێ دەڤێت خوە پەحن دکرن و دگۆتن: ” ل سەر دەمێ جەنابێ سەرۆکێ حکۆمەتێ یێ بەرێ نیچیرڤان بارزانى ئابۆرێ هەرێما کۆردستانێ هەلبەزین و خوەهاڤێتنێت مەزن و بلند و درێژ ب خوەڤە دیتن”، وەى هەوار ما هوین دێ دڕهن؟! بڕاستى هەمبەر مەلاقیا ب عەرەبى دهاتە پێشچاڤکرن و ب کوردى دهاتە وەڕگێڕان من نەشیا خوەڕاگر بمینم، ئەز ترسام ژ دیتنا وێ قڕێژێ بهەلاڤێژم، من گۆتە خوە مەجبۆر نینم سەر و دل و زکێ خوە بئێشسنم، وەختێ خوە ب عەربمەلاقانڤە بەیهۆدە بەردم، مەلاقێت مە بخوە تێرا مە و نیڤەک جیهانێ ژى هەنە!
جارێ دا ڤەگەرم گۆتارێن دلهینکەر و مزگینبەخش یێن من ل دەستپێکێ ئاماژە پێ داى، دێ بێژم: یێ رۆناکبیرێ مەزن (د.صادق زیبا کەلام) نەنیاسیت، کا ئەڤ کەسایەتە چەند ب وێر و ڕاستگۆیە، نە سەیرە ژ گۆتنێت وى ل هەولێرێ حێبەتى بمینت. (د.کەلام) ل ئیرانى، د نیڤا تەهرانێدا، ڕەخنەکا زەلال و بهێز ل فارسا و حکۆمەتا کۆمارا شیعیسزما ئیرانێ دگرت، ئێک ژ گۆتنێت ویێت بهێز ئەڤەیە: “ئەم فارس ڕەگەزپەڕێسن، ژ کەرب و ڕکمانییا عەرەباندا ئەم بووینە شیعەمەزهەب”، لەوا ئەوى ڕاستەڕاست هەمبەر مەزن سەرۆکێت هەرێمێ ژ سەرکردێت مالا بارزان، و ب بەرهەڤیا ژمارەکا باش ژ سیاسەتمەداران ب ڕاشکاوى بەحسێ تەوەر و ئاڤاکرنا بورجێت بلند کر، دیارکر: کو بهێچ ئاوایەکێ ئەو چەندە ڕەنگڤەدانا پێشکەفتنا ڕاستەقینە ناکتن، خوەیا ژى کر: ئەگەر خوەشگۆزەرانى ب ئاڤاهیێت بەرز بت، مومکنە ل گەل داگیرکەرێن کوردستانێ ژى ئەڤ چەندە هەبا، بڕاستى دەستێن خوە ل سەر برین و دیسان ل سەر دەرمانى ژى دەینا، بەحسێ بێ سەرۆبەرییا ڕەوشا پەرەورد و فێرکرنێ و گرنگیا ئاڤاکرنا مرۆڤێ کورد کر! کا ئاڤکرنا تاکى کا مرۆڤسازی؟، بەرۆڤاژ؛ ژ دەوەلەت سەرێ خرابکارییا سیاسى و گەندەڵسازیێ هەلویشنسازییا مرۆڤێ کورد 31 سالە دبەردەوامیێدایە!
ئەڤە ڕەخنەکا جوامێرەکێ بیانى بوو، دا بهێنە یا دلسۆزێت خۆیانێ مینا یا ڕۆژنامەڤانێت مەیێت ل گەل بەڕێز سەەرۆکێ حکۆمەتێ جڤیایین ئەو گرنگترە. گرنگیا وێ ڕەخنەگرتنێ ئەڤەیە: ئەوان چەندین دەرد و کول ڤاژى کرن، هەر ژ خرابییا ڕێکا، دوو حکۆمەتینیێ، پاشگەزیا ئازادییا دەربرین و ڕێکنەخۆشکرن ل رۆژنامەگەریا ڕاستەقینە، زیندانکرنا ڕۆژنامەڤانێت بەهدینان، بەحسێ قەیرانێت زێدە: قەیرنا ئاڤێ، قەیرانا پانزینێ، قەیرانا کەهرەبێ، قەیرانا مۆچەى؛ کاک رەئوفى ئاماژە کر: ژ ساڵا 2014 هەتا نها 34 مۆچەیێت پاشکەفت و ب لێبڕین ل لایێ حکۆمەتێنە، هات سەر قەیرانا بێ متمانەنییا خەلکێ ب حکۆمەتێ، نەڕاستیا ئیدعای و خوەدەرخستنا ب چاکسازیێ، گەندەڵیا مەزنە بەرپرسان ئەوێن ب دزیا نانێ خەلکێ بووینە ملیۆنێڕ و ملیاردێر بێى کەس بهێتە سزادان، پڕسا زێدەبوونا قاچەخچیاتیێ و چەندین پرسێن دیترێن مەرگەسات و حاشانەهلگر، دویڤرا هەڤالێت وى ژى نەمازە ڕێڤەبەرێ کەنالێ سپێدە ڕەخنەکا ڕاست و ئاڤاکەر گرت. هەر کەسێ بچەک وژدان و عەقل هەبت دزانت ئەم کورد بێی ڤێ پرۆسیسا ڕەخنەیی دێ هەر بەرەڤ شکەستنێ چین هەتا دهەلوەشین. یێ بێژت ئەڤە ڕەخنە خرابکەرە، بەلێ ڕاستە، ژبۆ گەندەڵى و خرابسازیێ خرابکەر و هەلوێشەنەرە، ژ بۆ ئایندەیەکێ گەش و پشڤەچووى زۆر ئاڤاکەرە.
