كوردستانینێرین

کوردۆ دژمنێ خوە بناسە!

راستە د نڤیسین و گەنگەشان دا، گەلەک ئاماژە ب “خوە بناسە/ سۆکرات” دهێتەدان، بەلێ هند گرینگی ب “دژمنێ خوە بناسە” ناهێتەدان، کو ئەڤ هەردوو “ناساندنە”، بۆ مە کوردان گەلەک گرینگن. ئانکو گرفتێن مە یێن سیاسی و رەوشەنبیری، ژ گرفتێن کولتور و جڤاکی دهێن. ب ڤی ئاوایی، پرۆسێسا لاوازی و قەلسیا ئەقلێ کوردی، خوە د سێ پرسێن گەوهەری “جڤاکی، رەوشەنبیری و سیاسی” دا دبینیت. راستە مە کار بۆ دژمنێ دەرڤە کریە، بەلێ مە کار بۆ دژمنێ ناڤخوەیی نەکریە. لەورا تەڤگەر و دیرۆکا دەڤەرێ ب گشتی، مینا لاشەکێ مریێ نەهێتە ڤەشارتیە، چونکو ئەم ل سەر دژمنێ خوەیێ مەزن، کو ئەقل و هشمەندیە نە راوستیاینە. ڤان پاشخانان وەکریە، کو کورد دژمنێن خوە بن، چونکو گەلێن نکارن مفای ژ ئەزموونێن خوە و دیرۆکێ وەرگرن، نەچارن ببنە قوربانێن هشمەندیا خوەشباوریا خوە.
ئیرۆ دوو تێگەهـ “ئەقلانی و ئازادی” بۆ مە گەلەک گرینگن، چونکو دژمنێ مەیێ سەرەکی ئەقل و هشمەندیا کەڤنارە. لەورا ئیرۆ ژی، ئەم گەلەک جاران رۆلێ داگیرکەر و دژمنێن خوە دبینین! ئها هوسا ئەم ل دەسپێکێ، ل سەر ئارمانجێن ڤەشارتیێن تەڤگەرێن کوردی نەراوستیاین. لەورا هێشتا د تەڤگەرێن کوردی دا، دژمنێ‌ سەرەکی نەهاتیە نیاسین و دەسنیشانکرن. د ڤان تەڤگەران دا، مە پتر کار و دژاتی ل سەر دژمنێن کلاسیک کریە، بەلێ مە هند گرینگی ب هزر و کارێ ل سەر دژمنێ ڤەشارتی/ ناڤخوەیی نەدایە، کو ئەو پتر دخوازیتە ریفۆرم و شۆرشێن هەردەم. ب ڤێ یەکێ، تەڤگەر و شۆرش ل سەر داگیرکەرێ بیانی هاتنەکرن، بەلێ پا تەڤگەر و شۆرش ل سەر داگیرکەرێ مەژی و بەریکێ/ خوەیانی نەهاتنەکرن. ئێدی دژمنێ مە یێ سەرەکی، بنواشێ کوورێ هشمەندیا مە یا کەڤنەشۆپە.
دڤێت بزاڤ و ریفۆرمێن ئیرۆ دهێنەکرن، ژ دژمنێن ناڤخوەیی/ هشمەندیا کەڤنارا خوەشباور دەست پێ بکەن، چونکو ئەو وێنێن دوهی یێن د نەهشیا مە دا دەبۆبووین، نکارن خوە دگەل ئیرۆ بگونجینن. سەرباری پەروەردە و ئاراستەکرنا جڤاکی، ب ئەقلێن کەڤنار و دوهی ناهێتەکرن.

  • ئەز نوکە ل سەر ڤێ مژارێ دنڤیسم، هیڤیدارم ب تێبینی و پێشنیارێن وە، بکارم بابەتی پتر دەولەمەند بکەم.

محسن ئۆسمان
بەرلین، 2022.08.12

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close