كوردستانینێرین

کوردۆ دژمنێ خوە “ئۆلدار، نەتەوەکار و چەپگەر”ان بناسە!

محسن ئوسمان

راستە ئەڤ ناڤنیشانە ل دەسپێکێ مرۆڤی راستی سنگەپێ/ شۆکێ دکەت، لێ ب هزرکرنێن هوور و کوور، گەلەک راستی و پرسیارێن لۆژیکی بەرچاڤ دکەت. دیسان راستە، نابیت مرۆڤ ب گەلەمپەری ل سەر “ئۆل، نەتەوە و چەپگەر”ان باخڤیت، بەلێ پا دەما تشتەک دبیتە دیاردە، تەروهشکان پێکڤە دهێنە سۆتن.
دیارە ئەڤ نڤیسینە دێ پتر پرسیاران، ژ راڤە و داڤەکرنێ دەرێژکەتن. ب درێژیا دیرۆکا کوردان، ئەڤ گەلە ب رێکا ڤان هەرسێ کەنالان هاتیە خاپاندن! مخابن ب رێکا ڤان کەنالان، پتر خزمەتا دژمن/ داگیرکەران، ژ گەلێ کورد هاتیەکرن. هەرچەندە ژی کورد و ئەرەب/ جەزائێری و فەلستینی، شانازیێ ب گەلەک قوربانیا خوە دکەن، بەلێ پا ژ خوە ناپرسن، کو مەرج نینە قوربانیێن مەزن، دەرئەنجامێن باش و مەزن هەبن، بەلکو ئەقلێن مەزن دکارن ئەنجامێن مەزن بەرهەم بینن.
راستە ئەڤ هەرسێ کەنالە “ئۆل، نەتەوە و چەپاتی”، ب گۆتن/ تیۆری رەخنێ و هزرێن جودا قەبوول دکەن، بەلێ ب کریار، هەرسێ کەنال ب تۆندی رەت دکەن! بنێرە هەر گۆتن و رەخنا مرۆڤ راستی یەک ژ ڤان هەرسێ کەنالان بکەت، دێ یەکسەر لەشکرەکێ ئامادەکریێ ب چەک و پەیڤێن کرێت و نەرێز (“مولحود، گاور، زندیق و…”، “خائین، خوەفرۆش، پاتەخور و…” و “مورتەد، مونحەرف، گەندەل و…”)، هێرشان کەنە سەر مرۆڤی! ب راستی هەر چەوا بیت، بەلێ دیسان گۆتن و رەفتارێن مرۆڤی، ڤەژەن و دەرئەنجامێن کەنالێن پەروەردا مرۆڤی‌نە.
پرسیارا گرینگ ل ڤێرێ، ئەرێ ئەڤ کەنالە خرابن یان ژی ئەڤ کەنالە ب خرابی دهێنە بکارئانین، کو مینا چەوا “فارس، تورک و ئەرەب”ان، کارین ب رێکان ڤان کەنالان، ژ خوە را ئیپمراتۆریەت و دەولەتان دامەزرینن و ئەم کورد ژی بووینە پالێن پویشی؟! باشە ئەگەر گونەها ڤان کەنالان وەک مێتۆد نەبیت، پا نەخوە دڤێت پێداچوونی ب خوە دا بکەین؟ راستە ژی ئەم نکارین ڤان هەرسێ کەنالان ریفۆرم بکەین، بەلێ پا مسۆگەر ئەم دکارین، تێگەهشتنا خوە ل سەر ڤان کەنالان ریفۆرم بکەین.
دیارە ب ڤی ئەقلێ دەمارگیر و هێرشکرنێ، ئەم نکارین ئاشتیا جڤاکی و یەکرێزیا ناڤمالا کوردی بپارێزین. لەورا دڤێت باوردارێن ڤان هەرسێ کەنالان، پێداچوونێ ب خوە دا بکەن و ئەگەر ئەم نەزان ژی بین، بەلێ پا هەروەکو کورد دبێژن، “نەزانی چاڤ دا جیرانی”، بلا ئەم ژی ئێدی بەس گلی و گازندان ژ باب و کالان بکەین و رەفتار و تێگەهشتنا مە ژ یا وان کمباختر بیت.
ب کورتی، “ئۆل، نەتەوە و چەپگەرایی”، ژ بۆ خزمەتکرنا مرۆڤان هاتینە، چونکو مرۆڤ بەرا ڤان هەرسێ کەنالان پەیدابووینە. لەورا دڤێت ئەم کورد ژی، ڤان هەرسێ کەنالان ب خوە بکاربینین، بێی کو زیانێ بگەهینە گەوهەرێ ڤان کەنالان. سلاڤ و روومەتەک مەزن ژ بۆ وان باوردارێن ڤان کەنالان، ب تایبەتی یێن کو بکارن ڤان کەنالان بێخنە خزمەتا گەلێ خوە. دگەل رێگرتنێ، ژ بۆ باوردارێن ڤان هەرسێ کەنالان.

  • هیڤیدارم ئەم تەڤ بکارین ب ئەقلانی و ئارامی، دیالۆگێن لۆژیکی و دوورهێلی، هەڤدوو ب زانیاریان دەولەمەند بکەین…

محسن ئۆسمان
بەرلین، 2022.08.17

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close