كوردستانینێرین

هەڤرکی و شەرێ بیزەنتیێ یەکێتی و پارتی!

Kan vara en bild av 1 person och text

محسن ئۆسمان

ئیرۆ هەرکەس ب زەلالی، گەفێن ئیران و تورکیا ل سەر قەوارەیێ “باشوور و رۆژئاڤایێ کوردستانێ”، دبینیت، مخابن تەنێ بریاربدەستێن یەکێتی و پارتی نەبن! ئەڤ هەڤرکی و شەرێ بیزەنتیێ یەکێتی و پارتی دکەن، ژ دەرڤەی نەحەز و دژمنێن کورد، کەس مفایی ژێ نابینیت!ئەرێ مە مێتۆدەکێ هەڤبەش، بۆ پرسگرێک و خەمێن خوەیێن هەڤبەش هەیە؟ ئەڤ دیرۆکا ئالۆز و دووبەرەکیا د ناڤبەرا پارت و پارچێن کوردستانێ دا، دخوازنە ڤەکۆلین و نرخاندنێن رژد.

مرۆڤ دکاریت بێژیت، ئەو گرفتێن هنگی ئیتالیا ژ ئیدیۆلۆگیا فاشیزمێ ــ Fascism و دووبەرەکیا د ناڤبەرا پارت و پێکهاتان دا دنالی. ئیرۆ کوردستان ژی، ژ هەمان هزرێن مالباتی/ کەڤنار و دووبەرەکیا د ناڤبەرا پارت و پێکهاتێن کوردان دا بریندار/ دنالیت. لەورا چارەیا رەوشا مە، خوە د خالێن هەڤبەشێن د ناڤبەرا ڤان پارت و پێکهاتان دا دبینیت.ئەگەر مرۆڤ ل پێڤاژۆیا رێبەر/ سەرۆکێن کورد یێن ڤان سەد سالێن تەڤگەرێن کوردی و ل سەر ئاستێ هەڤرکێن ناڤخوەیی و داگیرکەران بنێریت. ب زەلالی خویا دبیت، نە یەکرێزی و توورەبوونا قەبیلێ، هەرتم د رێکا وەرارێ و گوهەرینێ دا ئاستەنگبووینە، چونکو پرس و گرفتێن مە “نە یەکرێزی، خیانەت، دوراندنا ل سەر مێزا دیالۆگێ، خوەشباوری و خاپاندنن”.

مەرجێن یەکرێزیا کوردان، گرێدایی گوهەرینا رەوشەنبیریا سیاسیا کوردانە. ئەگەر ئەم نکارین پێشهات و هەڤکێشێن سیاسی فام بکەین، خوە ئەم دکارین ئاورەکێ ل یەکرێزیا ناڤ مالا کوردان بدەین، چونکو کاراکتەرێ مە ل سەر میراتگریەکا پری گرێ و گەنی و دیرۆکەک تژی تراژیدی و کینێن کەڤنار، سەرهەڤبوویە. ئێدی ئەو ئاستەنگێن رێگریا مەیا نەتەوەبوونێ ل دەما خوە وەک دوورهێل و تێگەهـ کرین، هەمان ئاستەنگێن ئیرۆ یێن “نە قەبوولکرنا هەڤدوو، نە یەکرێزیا گۆتار و ئارماجێن” مەنە. مە یەکرێزیا مالا کوردی نینە، هەروها مە چ ئارمانجێن هەڤبەش ژی نینن، بەلکو ب هەموو واتەیا پەیڤێ پارچەبوونە. ئێدی یەک ژ پرسگرێکێن مەزنێن کوردان/ دەڤەرێ دژهەڤی و نەیەکرێزیە، کو هەرتم تەڤنێن ڤان جڤاکان کرینەڤە ریس!

مرۆڤ دکاریت رەوشا ئیرۆیا کوردان، ژ دیرۆکا وانا هەڤدژ و بریندار ناسبکەت، چونکو ئەڤ پاشخانە بووینە چەکەکێ هزریێ دژی ل هەڤهاتن و یەکرێزیێ. دیارە ب ڤی ئەقلێ دەمارگیر و هێرشکرنێ، ئەم نکارین ئاشتیا جڤاکی و یەکرێزیا ناڤمالا کوردی بپارێزین. ئەرێ ما دبیت کورد، بەس ل دیلانێ دەستێن هەڤ بگرن؟! لەورا کورد تەنێ د خەمێن خوە و چاڤێن دژمنان دا یەکن.کوردان ب درێژیا دیرۆکا خوە، ل سەر ئاستێ “مالبات، قەبیلە، ئەشیرەت و پارتان”، ب تێری دژی هەڤ شەرکرن و تەڤ رێکێن ژ ناڤبرنا هەڤدوو ژی بکارئانین. ئەڤ هەڤرکی و شەرێن کوردان دژهەڤکرین، جار ب ناڤێ “راست و چەپ”، جار ب ناڤێ “ئەقلێ مالباتی و شۆرشا نوو” و جار ژی ب ناڤێ “ئۆلدار و سێکولار”! کوردان هند ئەڤ دیرۆک و رەوشە دووبارەکریە، مرۆڤ دبێژیت، قەی کورد ئەڤیندارێن مالوێرانی و تراژیدیا خوە دووبارەکرنێ‌نە!ب ڤێ پاشخانێ، مرۆڤ دکاریت بێژیت، دبیت داگیركەرێن مە ژ پارچەبوونا كوردستانێ تێر ببن، بەلێ پا هێشتا كورد ب خوە، ژ پارچەبوونا كوردستانێ تێر نەبووینە. لەورا هێشتا بیاڤێ پارچەبوونا ل سەر ئاستێ “تاک، پارت و جڤاکی”، ژ یەكگرتنا كوردان خورتترە

!ئەرێ ملەتێن گۆتارا وان یەک نەبین، دێ چەوا دەرد و ئارمانج یەک بن و دێ چەوا نێرین و ستراتیژیا پاشەرۆژێ یەک بیت؟ ئێدی ئەو گرفتێن ئیرۆ ئەم تێرا دەرباز دبین، ڤەدگەرنە نەبوونا یەکێتیا نەتەوەیی، راستە یەکێتیا گەلێ کورد، وەک دینامیکی و پرۆپاگەندە ل سەر ئاستێ دیرۆکی و رەوشەنبیری یا بەرچاڤە، بەلێ وەک ئاستێن سیاسی، ئابۆری و جڤاکی یا هندایە. ئیرۆ گرفت و ئاستەنگێن راستی گەلێ کورد دهێن:

“پاشڤەروویا جڤاکی، جودابوونا گۆتارا کوردی و نەبوونا دادپەروەری” گەلەکن.د تەڤگەرێن كوردی دا، راستە سەرهەڤیا كینێ هەبوو، بەلێ ل هەمبەر وەک هەڤتەریب سەرهەڤیا هشمەندیێ درست نەبوویە.ب کورتی، ئەگەر هەموو ئال پێکۆلێ نەکەن، ڤان ناکۆکی و دژمنداریا د ناڤبەرا پارت و پێکهاتێن کوردی دا لاواز و ب داوی نەئینن، دێ ئەڤ ناکۆکی و دژمنداریە مە ب داوی ئینن! مرۆڤ دکاریت ڤێ هەڤرکی و شەرێ بیزەتیێ یەکێتی و پارتی، ب “هشمەندیا خوەكوژیێ” ب ناڤ بکەت!

محسن ئۆسمان

بەرلین، 2022.11.19

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close